EMRAT/ Kontrabandonin barna, 8 persona bien në pranga. Procedohen penalisht 10 të tjerë (VIDEO)

Tetë shtetas përfunduan në prangat e policisë, ndërsa u proceduan penalisht 10 të tjerë dhe një u shpall në kërkim, në kuadër të operacionit “Veterinary”.

Bëhet fjalë për persona që bashkëpunonin për kontrabandimin dhe tregtimin e barnave të ndryshme.

Të prangosurit janë: Dragjica Aleksi, Cen Miftaraj, Dilaver Dorzi, Fatmir Reçi, Pavlo Vasili. Po ashtu janë ndaluar edhe punonjësit e Autoriteti Kombëtar i Veterinarisë dhe Mbrojtjes së Bimëve, AKVMB, shtetasit Fatbardha Guri, Gëzime Shehu, Nikolin Dajija.

Këta të fundit pas kontrolleve në subjektet e Alte dhe Eco Vetrin, tek raportet e kontrollit kanë shënuar se janë në rregull, ndërkohë që subjektet kanë pasur barna të skaduara.

MCN TV mëson se operacioni i organizuar nga Prokuroria dhe Policia e Tiranës është në vazhdim e sipër.

“Blutë” sekuestruan 100 lloje të ndryshme barnash, të dyshuara të kontrabanduara, me vlerë të konsiderueshme monetare.

NJOFTIMI

DVP Tiranë/Finalizohet nga Seksioni për Hetimin e Krimeve Ekonomike dhe Financiare, në bashkëpunim me Prokurorinë e rrethit Tiranë, operacioni policor i koduar "Veterinary".    

Bashkëpunonin për kontrabandimin dhe tregtimin e barnave të ndryshme, vihen në pranga 8 shtetas, procedohen penalisht 10 shtetas dhe shpallet në kërkim 1 tjetër.

 Sekuestrohen rreth 100 lloje të ndryshme barnash, të dyshuara të kontrabanduara, me vlerë të konsiderueshme monetare. Specialistët e Seksionit për Hetimin e Krimeve Ekonomike dhe Financiare të DVP Tiranë, në bashkëpunim me Prokurorinë pranë Gjykatës së Rrethit Gjyqësor Tiranë, pas një pune hetimore disamujore, të ndjekur me metoda proaktive, organizuan dhe finalizuan operacionin policor të koduar "Veterinary".

Si rezultat i këtij operacioni u arrestuan në flagrancë shtetasit:

- D. A., 53 vjeç, C. M., 60 vjeç, D. D., 60 vjeç, F. R., 63 vjeç dhe P. V., 60 vjeç;

- F. G., 55 vjeçe, G. Sh., 49 vjeçe dhe N. D., 34 vjeç, të tre punonjës të AKVMB (Autoriteti Kombëtar i Veterinarisë dhe Mbrojtjes së Bimëve).

Gjithashtu, u proceduan penalisht shtetasit A. M., 30 vjeç, D. Sh., 46 vjeç, K. C., 30 vjeç., A. T., 46 vjeç, B. Xh., 48 vjeç, V. P., 38 vjeç, V. Rr., 60 vjeç, V. K., 54 vjeç, V. B., 67 vjeç, E. Xh 56 vjeç, si dhe u shpall në kërkim shtetasi A. S., 49 vjeç.

Nga hetimet e kryera ka rezultuar se këta shtetas, në bashkëpunim me njëri-tjetrin, kanë kontrabanduar lloje të ndryshme barnash, me vlerë të konsiderueshme monetare, me qëllim tregtimin e tyre.  

Në cilësinë e provës materiale u sekuestruan rreth 100 lloje të ndryshme barnash.

Vijojnë hetimet për dokumentimin e plotë të kësaj veprimtarie kriminale, identifikimin dhe kapjen e personave të tjerë të përfshirë.

Materialet i kaluan Prokurorisë, për veprime të mëtejshme, për veprat penale “Prodhimi dhe tregtimi i barnave dhe pajisjeve mjekësore të falsifikuara ose të rrezikshme për jetën dhe shëndetin”, “Kontrabanda me mallra të tjera”, “Ruajtja ose depozitimi i mallrave kontrabandë“ dhe “Shpërdorimi i detyrës֝”.