Ish-strategjisti i Shtëpisë së Bardhë, Steve Banon, e sheh Italinë si qendër të universit politik. Banon është në një tur nëpër Europë, gjatë të cilit vijon të mbështesë partitë populiste.
Duke folur për Politico, ish-ndihmësi i presidentit Donald Trump e ka cilësuar koalicionin Lega-5 Yjet si një “eksperiment, që nëse funksionon do të ndryshojë politikën e globit”.
Banon ndodhet në Europë me synimin për të forcuar fondacionin me bazë në Bruksel, “The Movement”, i cili do të koordinojë dhe këshillojë partitë e djathta para fushatës së zgjedhjeve europiane të pranverës.
Banon thotë se qeveria italiane është një eksperiment i bashkimit të së majtës me të djathtën. “Një parti populiste me tendenca nacionaliste si 5 Yjet dhe një parti nacionaliste me tendenca populiste si Lega ... Është imperative që kjo të funksionojë, sepse tregon një model për demokracitë industriale nga SHBA-ja në Azi", ka thënë Banon.
Matteo Salvini i Lega-s, që mban postin e ministrit të Brendshëm, i është bashkuar Lëvizjes (The Movement), ndërsa gjatë qëndrimit në Romë, Banon ka takuar edhe liderin e Lëvizjes 5 Yjet, Luigi di Maio. Sipas burimeve pranë takimit, ata kanë pasur një dialog kontruktiv, por Lëvizja 5 Yjet nuk ka vendosur nëse do t’i bashkohet këtij projekti.
Pasiguria ka të bëjë me ndikimin që mund të ketë një lëvizje e tillë te baza e partisë. Lëvizja 5 Yjet konsiderohet si parti populiste e majtë dhe një përfshirje e mundshme në këtë lëvizje do ta tjetërsonte bazën, duke ndikuar me shumë gjasa edhe në rezultate. Ndërkohë, Bannon është në bisedime edhe me AfD-në e djathtë në Gjermani, Bashkimin Kombëtar të Marinë Le Pen në Francë dhe partinë nacionaliste Fidesz në Hungari.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
