Kurti: S’duhet të ketë ndalim të shamisë në jetën publike të Kosovës

Kryeministri Albin Kurti ka deklaruar se Kosova nuk duhet të ndalojë shaminë dhe elementet e tjera fetare në jetën publike.

Kreu i qeverisë ka theksuar se pragu i lejimit të shamisë duhet të jetë mosha 16-vjeçare.

Përmes një konference për media Kurti tha:

Qëndrimi im është që nuk duhet të ketë ndalim të shamisë dhe të elementeve të tjera fetare në jetën publike të qytetarëve por duhet të jemi të lirë, mirëpo gjithashtu kam thënë që mosha 16- jeçare duhet të jetë pragu dhe moshën 16-vjeçare e shohim si prag për shumë gjëra të cilat kanë ndodhur dhe që do të duhej të ndodhin”.

Meqë mund ta marrësh kartën e identitetit në moshën 16-vjeçare, nëse sistemi e mundëson që të lidhësh kurorë në moshën 16-vjeçare, meqë mosha mesatare është 35 vjeç e 2/3 është nën 35 vjeç mendoj që në të ardhmen nuk do të ishte keq që edhe mosha e votimit të ishte 16 vjeç. Ne e shohim moshën 16-vjeçare si moshë të pragut për shumë gjëra e po ashtu edhe për bartjen e shamisë”.