Deputeti demokrat, Astrit Patozi, gjatë fjalës së tij në Kuvend u ndal te hapja e dosjeve në kuadër të zbatimit të reforës në drejtësi. Patozi tha se maxhoranca i ka hequr mundësi opozitës të bëhet pjesë e Autoritetit të Hapjes së Dosjeve të ish-Sigurimit, çka sipas tij do ta bëjë joserioz dhe të besueshëm procesin.
“Si ka mundësi që ju pasardhësit e Partisë Komuniste doni të hapni dosjet? Si ka mundësi që Angela Merkel, 72 vjet pas Luftës së Dytë Botërore kudo shkon kërkon falje për krimet e Hitlerit.
Është njësoj sikur Merkeli të dilte të thoshte mirë bëri Hitleri që i vrau hebrenjtë. Ju në vend të ballistëve na shihni ne, megjithëse nuk kemi ndonjë lidhje direkte me Ballin. Por të kisha qenë në vendin e Ramës dhe Metës do të përgjërohesha që opozita të merrte pjesë në procesin e hapjes së dosjeve. Por ju doni që dishepujt e komunistëve të marrin pjesë në hapjen e dosjeve të tyre. E zëmë se mund ta bëni ju hapjen e dosjeve. Si ka mundësi që produkti që do të dalë nga ky autoritet i njëanshëm politik ju ta përdorni si filtër për reformën në drejtësi”, tha ai.
Patozi shtoi se pasoja direkte e përjashtimit të opozitës nga ky autoritet do të jetë humbja e votës së shtresës s ëish-të përndjekurve.
“Nuk mund të pritet prej jush asnjë reformë. Pas kësaj besoj se asnjë ish-i përndjekur nuk mund ta votojë këtë maxhorancë. Ata fyhen me qëndrimin që ju mbani ndaj dosjeve të Sigurimit dhe të kaluarës së tyre të vuajtur. Ata e shikojnë që jeni krejtësisht nostalgjikë dhe joseriozë”, tha ai.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
