Procesi që mund të pengojë Marine Le Pen të kandidojë për presidente

<p>Sondazhet sugjerojnë se liderja franceze e ekstremit të djathtë Marine Le Pen është më afër se kurrë për të fituar presidencën. Por një çështje gjyqësore mund t’i prishë të ardhmen e saj politike.</p> <p>Le Pen, partia e saj Bashkimi Kombëtar, dhe 26 individë të tjerë - duke përfshirë ligjvënësit aktualë dhe ish-deputetë francezë dhe eurodeputetë, akuzohen për përvetësim të fondeve të Parlamentit Evropian përmes asaj që prokurorët e quajtën një "sistem" për dhënien e kontratave për asistentët parlamentarë individëve që kryesisht punonin në operacionet e partisë, në vend të çështjeve të Bashkimit Evropian në kundërshtim me rregullat e BE-së. Skema e supozuar ka ndodhur midis 2004 dhe 2016.</p> <p>Le Pen i ka hedhur poshtë akuzat.</p> <p>Nëse shpallet fajtore pas gjyqit dy mujor, Le Pen mund të përballet me një dënim maksimal prej 10 vitesh pas hekurave dhe një gjobë deri në 1 milion euro. Ndonëse nuk dënohet me burg, asaj mund t’i ndalohet kandidimi në poste publike për një periudhë pesëvjeçare. Kjo do ta bënte të pamundur kandidimin e saj në zgjedhjet presidenciale të vitit 2027.</p> <p>Le Pen ka thënë tashmë se ka në plan të kandidojë në atë garë. Një sondazh i fundit zbuloi se, nëse zgjedhjet presidenciale do të mbaheshin sot, Le Pen mund të merrte deri në 40 për qind të votave në raundin e parë, në varësi të asaj se kush do të konkurronte kundër saj. Le Pen shënoi pak më shumë se 23 për qind në garën e fundit presidenciale dhe humbi balotazhin me 41 për qind të votave.</p> <p>Prokurorët thanë në një deklaratë se u ishte thënë nga Parlamenti Evropian se Bashkimi Kombëtar shpenzonte miliona euro në vit për asistentët parlamentarë, shumica e të cilëve mbanin poste kyçe brenda partisë.</p> <p>“<em>Avokatët e Parlamentit Evropian besojnë se në këtë rast Parlamenti ka pësuar dëme financiare dhe reputacioni</em>”, tha shërbimi për shtyp i Parlamentit në një deklaratë për <a href="https://www.politico.eu/article/trial-marine-le-pen-france-national-rally-president-european-parliament/">POLITICO</a>.</p> <p>Figura të tjera të profilit të lartë në të djathtën ekstreme franceze janë gjithashtu të implikuara, duke përfshirë Jean-Marie Le Pen, themeluesin e partisë dhe babain e Marine, si dhe zyrtarë të tjerë të zgjedhur si Louis Aliot, kryebashkiaku i qytetit jugor francez Perpignan.</p> <p>Jean-Marie, i cili është 96 vjeç, do të mungojë në gjyq dhe është vënë nën mbrojtje ligjore për shkak të shëndetit të tij të përkeqësuar.</p>