Nëna “nxjerr” Thaçin nga burgu, ish-presidenti shoqërohet nga Eulex për të vizituar familjen në Kosovë

Ish-Presidenti, Hashim Thaçi ka dalë nga paraburgimi këtë të hënë për të kryer një vizitë te familja e tij në Kosovë. 

Lajmin e ka  bërë të ditur zëdhënëse e Dhomave të Specializuara të Kosovës, Angela Griep.

“Për shkak të arsyeve bindëse humanitare, Trupi Gjykues ka udhëzuar Sekretarin që të menaxhojë një vizitë paraburgimi në Kosovë për Hashim Thaçin për të takuar familjen”, tha Griep.

Sipas medieve vendase mësohet se shkak i vizitës së tij është sëmundja e nënës. 

Hashim Thaçi ndodhet në qendrën e paraburgimit në Hagë prej nëntorit të vitit 2020.

Pas një procedure paraprake që ka zgjatur më shumë se dy vjet, gjykimi ndaj tij, me pretendimin për krime lufte, ka filluar në prill të këtij viti.