Mijëra këpucë janë vendosur në lëndinën para Shtëpisë së Bardhë si një mënyrë për të kujtuar fëmijët e vrarë në shkollat amerikane.
Ky demonstrim është ideuar nga grupi ndërkombëtar i avokatisë, Avaaz. Këpucët përfaqësojnë numrin e fëmijëve të vrarë me armë zjarri që nga viti 2012, kur u shënua masakra në shkollën Sandy Hook Elementary.
Aktiviteti u bazua në një kërkim të kryer nga Akademia Amerikane e Pediatërve, sipas të cilës 1300 fëmijë vdesin çdo vit nga armët e zjarrit në SHBA, mesatarisht 3 në ditë. Në bazë të këtij kërkimi, këpucët e vendosura para Shtëpisë së Bardhë ishin 7 mijë palë.
Qëllimi i këtij demonstrimi është rritja e ndërgjegjësimit për reformimin e ligjit për armët e zjarrit.
Rasti më i fundit i një masakre në shkollë është ai i muajit të kaluar në shkollën e mesme në Parkland, Florida, ku ish-nxënësi 19-vjeçar Nikolas Cruz vrau 17 persona në një sulm të armatosur. / Përgatiti: Gazmira Sokoli /
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
