BE do të bojkotojë samitin e Hungarisë për punët e jashtme

<p>Ministrat e Punëve të Jashtme të Bashkimit Evropian do të kundërshtojnë Hungarinë duke organizuar samitin e tyre të punëve të jashtme në gusht, në vend që të udhëtojnë në Budapest për eventin e kryeministrit Viktor Orbán.</p> <p>Hungaria, e cila mban presidencën e radhës të Këshillit të BE-së, planifikon të presë një samit të punëve të jashtme në Budapest më 28-29 gusht - një mundësi kjo që do t’i shërbejë Orbanit për t’i dhënë formë axhendës së politikës së jashtme të bllokut.</p> <p>Por pasi Orbán pengoi ndihmën për Ukrainën dhe pas vizitave në Moskë dhe Pekin, ku u takua me Vladimir Putin dhe Xi Jinping, takime të cilat nuk i koordinoi me 26 liderët e tjerë kombëtarë të BE-së, shumë ministra të Jashtëm kanë kërkuar një mënyrë për të mos u bërë mbështetës në atë që ata besojnë se nuk do të jetë gjë tjetër veçse një shfaqje propagandistike e Orbanit.</p> <p>Kjo ka bërë që Josep Borrell, shefi i politikës së jashtme të BE-së, të thërrasë ministrat në një këshill "formal" të punëve të jashtme në të njëjtën kohë me samitin e Orbanit. Lajmin e bën të ditur Politico, e cila u referohet tre diplomatëve të BE-së me njohuri të drejtpërdrejta mbi këtë plan, por që mbeten anonimë për shkak të sensitivitetit të çështjes.</p> <p><a href="https://www.fibank.al/individe/depozita-dhe-investime/depozita/depozita-e-hapur" target="_blank"><img alt height="100" src="https://www.mcntv.al/sites/default/files/fbank31.gif" style="float:left" typeof="foaf:Image" width="600"></a></p> <p>“Nëse do të ketë një këshill formal të punëve të jashtme, të organizuar nga përfaqësuesi i lartë [Borrell] në të njëjtën ditë, ministrat nuk do të mund të shkojnë në Budapest”, tha një nga diplomatët.</p> <p>Një tjetër shtoi se duke bojkotuar takimin e Budapestit, ministrat e tjerë të jashtëm donin të "dërgonin një sinjal të qartë se Hungaria nuk flet për BE".</p> <p>Edhe para luftës Rusi-Ukrainë, tensionet mes BE-së dhe Hungarisë kanë qenë ekzistuese. BE pretendon se nën qeverisjen e Orban, Hungaria ka shënuar hapa pas në demokraci dhe në sundimin e ligjit, si dhe ka prishur funksionimin normal të Unionit duke bllokuar miratimin e ligjeve ose financimin për të fituar koncesione në fusha që nuk kanë lidhje.</p> <p>Ministrat e vendeve të tjera të BE-së kanë qenë të gatshëm t'ia përcjellin Hungarisë këtë mesazh. Në takimin e parë nën presidencën hungareze, të organizuar në Budapest për të diskutuar politikën industriale, u paraqitën vetëm shtatë ministra nga vende të tjera. Nuk mori pjesë asnjë komisioner.</p>