Përgjatë ditëve të fundit, në disa zona të vendit ka pasur zjarre të qëllimshme kryesisht nëpër zona malore, me rrezikshmëri të lartë edhe për zonat e banimit. Vetëm gjatë ditës së djeshme janë djegur 300 hektarë pyje me lisa e dushqe, ne zonën e Kongrazhdit në Burrel. Në këto pyje gjatë gjithë ditës kanë qenë të aktivizuara pesë vatra zjarri, të cilat sipas banorëve, me gjithë ndërhyrjen e forcave ushtarake të zonës dhe të bashkisë Mat, ka qenë e pamundur shuarja e tyre.
Një tjetër zjarr i madh në një masiv pyjor është shfaqur në zonën e Bradvicës në Devoll. Zjarri ka nisur mbrapa vendit të njohur si Guri i Vjeshtës në kufi me Dardhën. Era ka favorizuar perhapjen e flakeve duke rrezikuar edhe pyjet e Dardhës, ndërsa ndërhyrja e mjeteve zjarrfikëse është bërë e vështirë për shkak të terrenit të thyer malor.
Zjarret, janë raportuar edhe në Tropojë, të masivi i gështenjave, në periferi të qytetit.
Lidhur me këtë problematikë, ministrja e Mbrojtjes, Olta Xhaçka, ka paralajmëruar të gjithë kryesit e këtyre akteve, që do të përballen me ligjin. Ajo ka inkurajuar banorët që të denoncojnë këto zjarre të qëllimshme, në mënyrë që shkaktarët të dënohën: “Një situatë e pazakontë, përballë së cilës, pushteti vendor apo strukturat përgjegjëse nuk mund të mjaftohen vetëm me kërkesat për ndërhyrje nga ajri apo toka. Kushdo, që guxon t'i vërë flakën pyjeve e kullotave dhe kërkon të krijojë pasiguri duhet denoncuar e përballur me ligjin", ka shkruar Xhaçka.
Zjarrvëniet e qëllimshme në zonat malore po rrezikojnë bimësinë e tyre, por edhe po vështirësojnë ndërhyrjen e forcave zjarrfikësve për shkak të terrenit të vështirë.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
