Dhjetëra familje në Gazën veriore kanë paketuar gjërat e tyre dhe po ikin sërish pas një paralajmërimi nga ushtria izraelite për një operacion të ri tokësor kundër Hamasit në zonën e Jabalya.
“Njerëzit u larguan nga shtëpitë e tyre këtë mëngjes dhe nuk dinë ku të shkojnë, duke mbajtur disa sende të thjeshta. Nuk ka mjete transporti,” tha Abu Alaa Asaf, një banor i Beit Lahiya.
Ushtria izraelite u bëri thirrje banorëve palestinezë që të evakuojnë zonat në veri, e cila është shtëpia e kampit më të madh të refugjatëve në Gaza, përpara se të njoftonte se dy brigada të Forcave të Mbrojtjes të Izraelit (IDF) rrethuan Jabalya-n për të ndaluar Hamasin të rindërtonte aftësitë e tij operacionale.
Para kësaj, u kryen sulme ajrore, duke goditur "dhjetëra objektiva ushtarakë", tha ushtria izraelite. Krahu ushtarak i Hamasit, Brigadat Al Qassam, tha të shtunën se ishte përfshirë në "luftime të ashpra" me forcat izraelite në Gazën veriore.
“Ne dëgjuam tingujt e shpërthimeve gjatë gjithë natës sikur lufta filloi sot,” tha Asaf.
Ismail Zaida, një banor i lagjes Sheikh Radwan në veri, pa "qindra" njerëz që iknin drejt qytetit të Gazës, gjithashtu në Gazën veriore.
Disa banorë të veriut po refuzojnë të lëvizin në Al-Mawasi, një zonë humanitare e caktuar nga Izraeli në jug. Muajin e kaluar, Izraeli goditi zonën, duke vrarë të paktën 19 persona, sipas autoriteteve shëndetësore të Gazës.
“Njerëzit preferojnë të vdesin në shtëpi sesa të poshtërohen aty-këtu. Ku të shkojmë? Nga një vdekje në tjetrën? Vdekja është kudo qoftë në jug apo në veri”, tha Zaida.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
