“Këneta nën ujë nga kukulla e bashkisë”/ Qytetarët e Durrësit sërish në protestë

Po zhvillohet sot në mbrëmje në Durrës një tjetër protestë para bashkisë së qytetit lidhur me përgjegjësitë e autoriteteve për përmbytjet e fundit. 

Protestuesit akuzojnë kryebashkiaken Emirjana Sako për mos marrjen e masave të nevojshme.  Protestuesit u bënë thirrje bashkëqytetarëve t'i bashkohen. Në shenjë revolte kanë hedhur domate dhe letra higjienike drejt godinës së bashkisë.

Protesta u shoqërua me tensione ndërsa në pankartat e protestuesve shkruhej: "Banorët e Kënetës nën ujë nga shiu dhe kukulla e Bashkisë në Santa Turke".

Një prej protestuesve është shoqëruar në komisariat nga policia, pasi ka hedhur një kapsollë.

Në përfundim pjesëmarrësve iu komunikua se protesta u mbyll dhe mund të zhvendosen përpara Drejtorisë Vendore të Policisë.

Sipas informacioneve, kjo thirrje u bë pasi policia ka arrestuar personin që dyshohet se ka hedhur lëndë piroteknike gjatë protestës para godinës së bashkisë.

Kujtojmë që një pjesë e mirë e Durrësit u paralizua nga përmbytjet e fundit, ku ndonëse reshjet kanë ndalur, uji vijon të jetë prezent në disa zona. Më problematike situata ka qenë në Sukth dhe Katund të Ri, ku shumë banorë janë evakuuar.