U shua ashtu siç nisi. “Kryengritja” e grupit Wagner nuk ka zgjatur as 24 orë. Marshimi i tyre drejt Moskës u ndal 200 km para se të arrinin në destinacion. Rol vendimtar luajti ndërmjetësimi i presidentit bjellorus, Lukashenko. Një ditë pasi u nisën me të shtëna në ajër dhe duartrokitjet e turmës nga qyteti rus i Rostovit, milicët e Wagner dhe lideri i tyre Prigozhin kanë rënë në heshtje. Sipas New York Times, e cila citon burime të inteligjencës, autoritetet amerikane ishin informuar prej ditësh për planet e kreut të grupit mercenar Wagner. Ndërkohë, Instituti për Studimin e Luftës (ISW) pretendon se rebelimi i Prigozhin mund të ketë dështuar, por Kremlini tani po përballet me një situatë "thellësisht të paqëndrueshme". Në një intervistë për Rossiya 1 të regjistruar më 21 qershor dhe raportuar sot nga Tass, Vladimir Putin pohon se prioriteti i tij është vëmendja ndaj operacionit special ushtarak në Ukrainë. “Me këtë e nis ditën time dhe po me të". Yevgeny Prigozhin duket se është zhdukur ose gjithsesi qëndron i heshtur. Lideri i milicisë Wagner ra dakord dje të largohej nga Rusia dhe të shkonte, për momentin, në Bjellorusi, së bashku me njerëzit e tij, në një marrëveshje të ndërmjetësuar nga Minsku. Megjithatë, se ku ndodhet ai për momentin është e paqartë. Informacioni i fundit është që nga mbrëmja e së shtunës, ku ai shfaqet në një video duke lënë selinë e qarkut ushtarak në Rostov-on-Don pasi ra dakord të transferohej në Bjellorusi. Sipas marrëveshjes, akuzat penale kundër Prigozhin do të bien, por për më tepër nuk dihet. Sa i përket luftëtarëve Wagner, zëdhënësi i Kremlinit Peskov tha se ata nuk do të përballen me veprime ligjore për pjesëmarrjen në marshimin në Moskë, duke thënë se Kremlini ka "respektuar gjithmonë veprat e tyre heroike" në vijën e frontit në Ukrainë. Por, sipas ekspertëve, ashtu si me marrëveshjen, mbeten shumë pikëpyetje për fatin e milicëve pas kryengritjes së tyre jetëshkurtër.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
