Kosova/ Heqja e taksës mbi produktet serbe në këmbim të vizave?

Të hënën, komisioneri për Zgjerimin në BE, Johanes Hahn, do të vizitojë Prishtinën, ku do të takojë krerët më të lartë të shtetit të Kosovës.

Siç raporton Gazeta Express, e cila u referohet burimeve brenda qeverisë dhe Kuvendit të Kosovës, taksa ndaj produkteve të Serbisë dhe atyre të Bosnjës e Hercegovinës, e vendosur disa ditë më parë, mund të hiqet në këmbim të futjes së Kosovës në axhendë për liberalizimin e vizave.

“Taksa hiqet në rast se Kosova futet në axhendën e liberalizimit të vizave. Johanes Hahn nesër do të ushtrojë presion të madh në takimet që do t’i zhvillojë me përfaqësuesit e shtetit”, thonë burimet.

Një ditë më parë, ministrja e Integrimeve, Dhurata Hoxha, tha se në axhendën e publikuar për mbledhjen e Këshillit të Ministrave të BE-së për datën 6 dhjetor, Kosova nuk figuron në rend dite për çështjen e liberalizimit të vizave.

Pak ditë më parë, qeveria e Kosovës vendosi një taksë 100% për produktet e Serbisë dhe atyre të Bosnjes. BE e kundërshtoi këtë vendim, ndërsa katër kryetarë të komunave me shumicë serbe dhanë dorëheqjen.