Greqia ndalon zyrtarët dhe diplomatët të marrin pjesë në ngjarjet e organizuara nga Tajvani

Qeveria e Greqisë u ka kërkuar zyrtarëve publikë në vend dhe jashtë vendit që të braktisin ngjarjet e organizuara nga Tajvani, nga frika e reagimit nga Kina.  

Kështu shkruan gazeta Nikkei, e cila ka siguruar një kopje të një emaili të qarkulluar disa ditë përpara një pritjeje të organizuar në Athinë muajin e kaluar, me rastin e festës kombëtare të Tajvanit.

Në qarkore, Ministria e Jashtme greke u kërkon diplomatëve dhe zyrtarëve civilë që të shmangin ngjarjet, një nismë “e paprecedentë”, sipas një burimi marrës të letrës të cituar nga gazeta.

Emaili, i datës 4 tetor, paralajmëron se ngjarjet e organizuara nga Tajvani dhe ata që marrin pjesë në to mund të jenë subjekt i sanksioneve nga Kina, e cila e konsideron ishullin me 24 milionë banorë, provincën e saj të shkëputur.

Qarkorja, e etiketuar “urgjente” dhe e nënshkruar nga zëvendësministrja e jashtme greke, Alexandra Papadopoulou, i pengon gjithashtu zyrtarët grekë që të marrin pjesë në takime me përfaqësuesit tajvanezë në zyrat qeveritare ose zyrat e përfaqësuesve, ambasadat de facto të ishullit jashtë vendit.

“Pjesëmarrja e ministrave, anëtarëve të parlamentit dhe zyrtarëve civilë në pritjet apo ngjarjet e Zyrës së Përfaqësimit (Tajvanezëve në Athinë) duhet të shmanget”, thuhet në email.

Pjesëmarrje të tilla, paralajmëron letra, do të perceptohen si një njohje indirekte e pavarësisë së Tajvanit dhe mund të shkaktojnë probleme serioze për marrëdhëniet midis Greqisë dhe Kinës.