Rritja e çmimit të ujit, Veliaj: Brenda një periudhe 2-vjeçare 24 orë ujë të pijshëm.

Kreu i Bashkisë së Tiranës Erion Veliaj në një dëgjesë në Këshillin Bashkiak, shpjegoi pse duhet të rritet çmimi i ujit të pijshëm në Tiranë.

Para këshilltarëve, por jo atyre të djathtë, te cilet mungonin, Veliaj tha se kjo është e vetmja mënyrë për të rritur investimet dhe për t’i siguruar Tiranës brenda një periudhe 2-vjeçare 24 orë ujë të pijshëm.

“Orari i shërbimit ka qenë me 7 orë ujë kur e la Basha sot jemi me 13 orë. Maksimumi që kemi arritur të bëjmë është rritja me 85% e furnizimit me ujë. Nuk ka asnjë mënyrë tjetër si të rrisim investimet.

Shumica prej nesh kur hapim çezmën ka ujë. 90% e Tiranës nuk e kupton kur mungon uji sepse kanë depozitat. Zonat e tjera nuk mund t’i heqim depozitat se këto e sigurojnë 24 orëshin. Arsyeja pse nuk ndihet është sepse bëhet furnizimi i depozitave. Në Bovillë klorinim i parametrave evropiane. Në pallate dëmtohet cilësia e ujit në depozita.

Pyetja është nëse duhet ta bëjmë 24 orë, dy janë mundësitë, ose të shpikim diçka që se ka bërë askush ose të shohim kush e ka shpikur rrotën. Dy janë shembujt, Korça dhe Pogradeci që e kanë 99 dhe 95 lekë.

Kur shkoi Korça nga 40 lekë në 99 lekë, kur do merrte një kredi nga KFW për rrjetin e ujësjellësit. Sot Korça nuk e ka problem ujin e pijshëm”, deklaroi Veliaj.

Kryebashkiaku tha se ky hap, për të rritur me 20 lekë çmimin e ujit, një rritje më pak se një gazetë është e vetmja mënyrë për të shtuar burimet e ujit, për herë të parë që nga koha e ‘xhaxhit’. Ai përmendi edhe kryetarin e Bashkisë së Kamzës, Xhelal Mziu, duke i kujtuar çmimin e ujit që është shumë herë më i lartë se në Tiranë, kur ky ujë shitet nga UKT.

Sipas Veliajt një problematikë evidente në kryeqytet që lidhet me mungesën e furnizimit të ujit janë edhe burimet e vjetra. Veliaj theksoi se këto burime duhet të shtohen, ndërsa theksoi me batutë se i bie që qytetarët do të duhen të lahen veç ditëve të shtuna.

“Duhet të shtojmë burimet, ndryshe ne do lahemi të shtunën si në kohën e shkuar. Dëgjova Saliun që tha: ‘Bovilla është plotë’. Po si qenka plotë? Kapacitet do rritur. Ju flisni si shkencëtar. Deri dje thoni mos e privatizo. Po mirë po e bëjmë vetë. Tani thoni pse se privatizoni. Përveç burgut ai hidrauliku meriton çmim giness, se si i vë gypat. Ne jetojmë si në Çeçeni dhe pretendojmë të bëjmë protestë si në Zvicër. Guri i parë që bie ta thyen në mes atë që është bërë me gizën e partive. Rrjeti i shpërndarjeve është një problem. Isha me Elez Gjozën në Sauk të vjetër, aty ishin shtuar shtëpitë, por rrjeti ishte i vjetër. Zona që përfiton më shumë është Fresku, Astiri që është me puse edhe Yrsheku”, Veliaj në Këshillin Bashkiak.