Avionët luftarakë amerikanë rrëzuan të dielën një objekt tetëkëndor mbi liqenin Huron, tha Pentagoni, incidenti i fundit që kur një balonë e dyshuar kineze vëzhgimi i vendosi forcat e sigurisë së Amerikës së Veriut në gatishmëri të lartë.
Ky është objekti i katërt fluturues i rrëzuar mbi Amerikën e Veriut nga një raketë amerikane në pak më shumë se një javë.
Gjenerali i Forcave Ajrore të SHBA-së, Glen VanHerck, i cili ka për detyrë të ruajë hapësirën ajrore të SHBA-së, u tha gazetarëve se ushtria nuk ishte në gjendje të identifikojë se cilat janë tre objektet më të fundit, si qëndrojnë lart apo nga vijnë.
“Ne po i quajmë objekte, jo balona, për një arsye”, tha VanHerck, kreu i Komandës së Mbrojtjes Ajrore të Amerikës së Veriut (NORAD).
VanHerck shtoi se nuk e përjashton mundësinë aliene apo ndonjë shpjegim tjetër.
Do presim që komuniteti i inteligjencës dhe komuniteti i kundërzbulimit ta zbulojnë më shumë.
Një tjetër zyrtar i mbrojtjes, duke folur në kushte anonimiteti, tha më pas se ushtria nuk kishte parë asnjë provë që objektet ishin jashtëtokësore, raporton Reuters.
Me urdhër të Presidentit Joe Biden, një avion luftarak amerikan F-16 e rrëzoi objektin në orën 14:42 me orën lokale mbi liqenin Huron në kufirin SHBA-Kanada, tha në një deklaratë zyrtare zëdhënësi i Pentagonit, gjeneral brigade Patrick Ryder.
Megjithëse nuk përbënte një kërcënim ushtarak, objekti mund të kishte ndërhyrë potencialisht në trafikun ajror të brendshëm pasi po udhëtonte me shpejtësi.
Objekti dukej të ishte tetëkëndor në strukturë, me vargje të varura, por pa ngarkesë të dukshme, tha një zyrtar amerikan duke folur në kushte anonimiteti.
Objekti besohej të ishte i njëjtë me atë të zbuluar së fundmi mbi Montana pranë vendeve të ndjeshme ushtarake, duke shkaktuar mbylljen e hapësirës ajrore të SHBA-së, njoftoi Pentagoni. Ushtria do të përpiqet të rimarrë objektin e rrëzuar mbi liqenin Huron për të mësuar më shumë rreth tij, tha VanHerck.
Ai shtoi se ka të ngjarë të ketë rënë në ujërat kanadeze.
Incidenti ngriti pikëpyetje në lidhje me një mori objektesh të pazakonta që janë shfaqur mbi qiellin e Amerikës së Veriut javët e fundit dhe ngriti tensionet me Kinën.
Zyrtarët amerikanë e identifikuan objektin e parë si një balonë mbikëqyrëse kineze dhe e rrëzuan në brigjet e Karolinës së Jugut më 4 shkurt.
Të premten, një objekt i dytë u rrëzua mbi akullin e detit pranë Deadhorse, Alaska. Ndërkohë një objekt i tretë u shkatërrua mbi Yukon të Kanadasë të shtunën, teksa hetuesit janë ende në kërkim të rrënojave.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
