Puthja është një ndër aktet tona më të parapëlqyera. Në dukje puthja ngjan cazë e pështirë, pasi po ta shohësh objektivisht, ndarja e pështymës me dikë tjetër është një gjë e rëndë për t’u bërë. Në fakt, ne përcjellim afro 80 milionë baktere për çdo dhjetë sekonda që puthemi me njëri-tjetrin.
Shumica e këtyre mikrobeve janë krejtësisht beninje, kështu që nuk ka asgjë për t'u shqetësuar.
Po pse vallë e ndajmë pështymën me dikë?
Para së gjithash, na bën të ndihemi mirë. Buzët tona janë të mbushura plot me qeliza receptore, të cilat i bëjnë ato shumë të ndjeshme. Në fakt, së bashku me majat e gishtave buzët mendohet se kanë përqendrimin më të larta të qelizave receptore.
Kur kënaqeni duke puthur dikë, këta receptorë dërgojnë sinjale në trurin tuaj dhe lëshojnë kimikate si dopamina, e cila ushqen sistemin tuaj shpërblyes dhe ju bën të doni të vazhdoni edhe më me puthjen. Endorfinat, qetësuesit natyralë të trupit tuaj, gjithashtu lëshohen dhe përforcojnë ndjenjën e kënaqësisë. Nëse është një puthje me të vërtetë e mirë, truri juaj mund të lëshojë edhe oksitocinë, "hormonin e dashurisë", i cili na bën të ndjehemi të ngrohtë dhe të dashur, dhe rrit lidhjen tonë me personin tjetër.
Pështyma e mashkullit përmban një sasi testosteroni që rrit epshin. “Duke qenë një veprim i nxitur nga emocionet, puthja na ndihmon të zgjedhim partnerin tonë më të përshtatshëm. Njerëzit nuk kanë aftësi të forta nuhatjeje dhe puthja ju lejon të nuhatni dhe shijoni një person dhe të shihni nëse keni përgjigje të ndryshme imune pasi ne priremi të ndjehemi më të tërhequr nga dikush me një përgjigje të ndryshme imune. Duke puthur dhe shijuar dikë ke mundësinë për të vlerësuar se sa i ngjashëm apo i ndryshëm është ai individ biokimikisht", shprehet Dr Sarah Johns, eksperte e riprodhimit njerëzor dhe psikologjisë evolucionare në Universitetin e Kentit, sipas Business Insider.
Askush nuk e di se nga erdhi puthja. Ka disa debate nëse kemi filluar ta puthim njëri-tjetrin për arsye kulturore, apo nëse është diçka që ne evoluuam biologjikisht.
Rreth 90% e popullsisë njerëzore puthen në një mënyrë ose në një mënyrë tjetër, në mjaft raste duke bërë gjëra të ngjashme siç janë fërkimi i hundëve, duke sugjeruar se mund të jetë diçka instinktive.
Puthja nuk është unike vetëm për njerëzit. Primatët si bonobot shpesh puthen me njëri-tjetrin, dhe macet e qentë gjithashtu.
Disa shkencëtarë besojnë se puthja mund të ketë evoluar nga sjelljet e "ushqyerjes përmes gojës", domethënë kur nënat kalojnë ushqim nga goja e tyre tek pasardhësit e tyre. Zogjtë ende e bëjnë këtë me të vegjlit e tyre. Një teori është se me kalimin e kohës, buzët u bënë të njohura si një veprim i përkujdesjes dhe dashurisë.
Sipas psikologëve evolucionarë në Universitetin e Albany, mënyra se si burrat dhe gratë ndihen për puthjen mund të ndryshojë mjaft në mënyrë të konsiderueshme.
Në një studim të 1,041 studentëve të kolegjit, studiuesit zbuluan se gratë i kushtonin më shumë vëmendje se burrat puthjes, duke këmbëngulur të puthnin para seksit dhe theksonin rëndësinë e puthjes gjatë dhe pas takimeve seksuale.
Burrat ishin më të lumtur që bënin seks pa u puthur dhe nuk u shqetësuan nëse partneri i tyre ishte një puthës i mirë apo jo. Ata gjithashtu kishin më shumë të ngjarë se gratë që të fillonin puthjen me gjuhë.
Pra, qoftë një gjë evolucionare, apo thjesht diçka që e kemi zgjedhur me kalimin e kohës, njerëzit me të vërtetë kënaqen duke u puthur.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
