Historia e dashurisë mes Artenida Asllanajt, një vajze shqiptare, dhe Yassine Ghachchem, një të riu me prejardhje nga Tunizia, ka bërë bujë në rrjetet sociale.
Çifti, që u njoh në Gjermani, është tashmë i martuar dhe videot nga dasma e tyre në Shqipëri janë bërë virale për atmosferën plot energji dhe gëzim që solli nusja shqiptare.
E ftuar në programin e mëngjesit “Zgjohu me MCN”, Artenida rrëfeu përvojën e saj dhe mënyrën si arriti të organizonte një dasmë tradicionale shqiptare, por edhe si e bindi familjen të pranonte lidhjen me një të huaj.
Në fillim as nuk e kuptova që isha bërë virale. Më pas pashë videot pranë DJ-së dhe e kuptova që momenti ynë kishte marrë dhenë. Kam shpirt feste dhe më pëlqen kjo gjë, nuk më shqetësojnë komentet, sepse në fund të fundit mora atë që doja.
Dasma u zhvillua në Shqipëri dhe kishte një atmosferë krejt shqiptare, me muzikë, valle e tradita që u ndërthurën me kulturën tuniziane.
Bëmë një dasmë tradicionale. Kishim të ftuar nga të dy vendet, dhe prindërit e Yassine, që jetojnë në Siçili të Italisë morën pjesë me shumë emocion. Ishte një ditë e paharrueshme.
Çifti është njohur gjatë punës së tyre në Gjermani, dhe siç tregon nusja, gjithçka nisi në mënyrë spontane megjithatë, rruga drejt pranimit të lidhjes nga familja e saj nuk ka qenë e lehtë.
Një ditë pas punës, më pyeti kush do të dilte me të për një kafe. I thashë ‘po vij’, dhe ashtu nisi gjithçka.
Në fillim familja ime nuk ishte dakord. Ishte Yassine ai që i ndryshoi mendjen vëllait tim duke i thënë që unë e dua motrën tënde dhe dua ta bëj të lumtur. Më pas arrita të bind edhe prindërit, sidomos mamanë, me të cilën ndaj gjithçka. Nuk ishte e lehtë, por dashuria triumfoi.
Në muajin dhjetor, shënojmë tre vjet së bashku, duke treguar se dashuria nuk njeh kufij.
Nga ana e tij, Yassine shprehet se gjithmonë kishte patur një admirim të veçantë për vajzat shqiptare.
E kam dashur gjithmonë një nuse shqiptare.
Më pëlqen mënyra si i doni njerëzit dhe si i respektoni familjarët. Me Artenidën u ndjeva menjëherë mirë, ishte ndjenja që kërkoja.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
