Gjykata Kundër Korrupsionit dhe Krimit të Organizuar shpalli vendimin ditën e sotme për ish-zyrtarët e pandehur në dosjen e njohur si “Sterilizimi”, një nga çështjet më të bujshme që lidhet me sektorin e shëndetësisë në vend.
Mes të akuzuarve ishin edhe ish-zëvendësministri i Shëndetësisë, Klodian Rrjepaj, si dhe biznesmeni Ilir Rrapaj.
Ish-zëvendësministri Klodian Rrjepaj u shpall i pafajshëm për akuzën e përfshirjes në grup të strukturuar kriminal, por u gjet fajtor për veprat penale të “vjedhjes duke shpërdoruar detyrën” dhe “falsifikimit të dokumenteve”.
Gjykata e dënoi fillimisht me 6 vite burgim, por për shkak të aplikimit të gjykimit të shkurtuar, dënimi i tij u ul në 4 vite heqje lirie.
Edhe biznesmeni Ilir Rrapaj u shpall i pafajshëm për akuzën e grupit të strukturuar kriminal. Ai u dënua me 6 vite burg, por me përfitimin e gjykimit të shkurtuar, dënimi përfundimtar u reduktua në 4 vite.
Në kuadër të kësaj çështjeje, mjeku Arben Gjata u dënua me 3.6 vite burg. Me aplikimin e gjykimit të shkurtuar, dënimi iu ul në 2.4 vite.
Gjykata vendosi pezullimin e ekzekutimit të dënimit, duke e vendosur atë në shërbim prove për një periudhë dyvjeçare.
Marsela Sejranaj u dënua me 3 vite e 6 muaj, me ulje 2 vite e 4 muaj, por vendimi u pezullua me shërbim prove.
Saimir Kadiu u dënua 3 vite e 6 muaj, me ulje 2 vite e 4 muaj, lirohet nga arresti në shtëpi.
Petref Mersini, u dënua 3 vite e 6 muaj, me ulje 2 vite e 4 muaj, dënimi u pezullua me 24 muaj shërbim prove.
Gent Burazeri u dënua me 1 vit e 6 muaj, me ulje 1 vit, e konvertuar punë në interes publik.
Naile Ajazi u dënua me 1 vit e 6 muaj, me ulje 1 vit, e konvertuar në dy vite shërbim prove.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
