Tetë persona kanë humbur jetën nga përmbytjet dhe rrëshqitjet e dheut ditët e fundit në Vietnam, njoftuan ditën e sotme autoritetet vendase.
Që nga fillimi i gushtit, vendi është goditur nga stuhi të forta, pasi më parë ka përjetuar valë të nxehta të zgjatura dhe thatësirë prej muajsh.
Në Vietnamin verior, tetë persona, përfshirë dy fëmijë, vdiqën javën e kaluar në provincat malore të Yen Bai, Lai So, Son La dhe Thai Nguyen.
Stuhitë dëmtuan qindra shtëpi dhe shkatërruan të korrat, tha agjencia e kontrollit të fatkeqësive të Vietnamit.
Media shtetërore publikoi fotografi të shtëpive të rrëshqitura nga balta, rrugë të bllokuara ose të dëmtuara dhe pemë të shkulura.
Në muajin korrik, rrëshqitja e dheut kishte ndodhur tashmë në rajonet qendrore të vendit. Në qytetin malor të Dalatit, tre oficerë policie dhe një civil u vranë kur një stacion policie u gropos nën baltë.
Malësitë në Vietnamin qendror dhe jugor kanë regjistruar 5% deri në 10% më shumë shi se zakonisht që nga fillimi i sezonit të shirave në maj.
Në Vietnamin verior, temperaturat rekord dhe thatësira e paprecedentë në maj dhe qershor shkaktuan ndërprerje të papritura të energjisë elektrike në shumë industri vendase dhe të huaja.
Sipas shkencëtarëve, ngjarjet ekstreme të motit janë intensifikuar për shkak të ndryshimeve klimatike.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
