Një sasi prej 275 kilogramë lëndë narkotike e llojit marijuanë, është kapur nga autoritetet policore të Riminit, në Itali. Sipas mediave italiane, hetimet për goditjen e këtij rasti kanë nisur që në verën e këtij viti, ndërsa në pranga janë vënë tre shtetas shqiptarë. Iniciativa e autoriteteve italiane për nisjen e këtij hetimi, ishte arrestimi i dy vëllezërve shqiptarë me 1.5 kilogramë marijuanë ndërsa operacioni u mbyll mëngjesin e sotëm duke vënë në pranga edhe një tjetër shqiptar.
Falë punës investigative të repartit operativ të antidrogës së Riminit, u sinjalizua mbërritja e një ngarkese droge në territorin e provincës së Riminit. Operacioni u finalizua me kapjen e një furgoni në zonën Spadarolo të Rinimit. Në dyshemenë e modifikuar të automjetit u gjend 160 kg hashash e 115 kg marijuanë. Pakot e drogës kishin të stampuar figura filmash vizatimorë e filma serialë televizivë.
Identifikimi i furgonit erdhi pas mbajtes nën përgjim të disa anëtarëve shqiptarë të këtij grupi kriminal që pasditen e datës 3 dhjetor kishin kryer lëvizje të dyshimta me automjetet e tyre. Në një rrugë dytësore të zonës industriale të Sparadarolës në Rimini autoritetet italiane ndaluan furgonin me drogë e në vendngjarje u arrestuan 3 trafikantë shqiptarë.
Dy prej tyre të moshës 26 e 35 vjeç janë banues në Rimini, shqiptari i tretë 35 vjec, pa leje qëndrimi në Itali, u kap pas ndjekjes prej disa minutash nga policia italiane. Ndërsa shoferi i furgonit mundi të arratisej e është shpallur në kërkim. Tre trafikantët shqiptarë ndodhen në arrest me burg e janë në dispozicion të autoriteteve gjyqësore italiane
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
