Përdorimi i smartfonëve, tabletëve dhe laptopëve mund të bëhet shkak për një sërë patologjish. Teknologjia e futur në përdorim masiv sidomos në dhjetëvjeçarin e fundit nuk është testuar ende plotësisht për efektet që mund të ketë në shëndetin e përdoruesve në terma afatgjatë. Shkencëtarët kanë arritur së fundmi në përfundimin se drita blu që lëshojnë ekranet e smartfonëve, laptopëve dhe pajisjeve të tjera dixhitale dëmton shikimin dhe përshpejton verbërinë.
Studiuesit në Universitetin e Toledos në SHBA kanë zbuluar se ekspozimi i gjatë në këtë dritë gjeneron molekula toksike në qelizat që kanë të bëjnë me ndjeshmërinë e dritës në sy. Kjo mund të çojë në degjenerimin makular, një sëmundje e pakurueshme që prek pjesën e mesme të aparatit të shikimit. Drita blu ka një gjatësi vale më të vogël dhe më shumë energji krahasuar me ngjyrat e tjera.
Ekspertët thonë se korneja dhe lentet nuk mund ta bllokojnë dhe as ta reflektojnë këtë dritë. Kjo bën që ajo të dëmtojë retinën.
Degjenerimi makular është një problem i zakonshëm për moshat mbi 50-60 vjeç, që manifestohet me humbje të ndjeshme të shikimit. Ai shkaktohet nga vdekja e fotoreceptorëve, ose ndryshe qelizat e ndjeshme ndaj dritës, që ndodhen në retinën e syrit. Degjenerimi makular për shkak të moshës, edhe pse nuk shkakton verbëri të plotë, i bën të vështira aktivitetet e përditshme si leximi apo edhe thjesht dallimi i fytyrave apo objekteve.
“Nëse retina ekspozohet ndaj dritës blu, qelizat e fotoreceptorëve nisin të vdesin. Ato nuk rigjenerohen më dhe kjo do të thotë se dëmi është i pakthyeshëm”, thotë një nga autorët e studimit.
Ekspertët e okulistikës këshillojnë mbajtjen e syzeve që filtrojnë rrezet UV dhe dritën blu dhe shmangien e përdorimit të smartfonëve ose tabletëve në errësirë.
Studimi është publikuar në “Scientific Reports”.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
