Kryeministri i Maqedonisë së Veriut, Zoran Zaev, ka paralajmëruar se pas vendimit të BE-së për të mos hapur negociatat me vendin e tij, marrëveshja e Prespës për emrin mund të rrezikohet, pasi të dy proceset janë të lidhura thelbësisht.
Duke folur për Euroneës-in grek në Shkup të hënën, Zaev tha se disa pika thelbësore të marrëveshjes së nënshkruar me Greqinë në verën e vitit 2018 për zgjidhjen e një mosmarrëveshjeje që zgjati disa dekada, janë të lidhura me përparimin e pranimit të vendit të tij në BE.
“Disa kapituj do të jenë të ngrirë, sepse nuk mund të zbatohen. Ne do të përpiqemi t'i zbatojmë ato, por gjërat janë të lidhura me njëra-tjetrën", ka thënë Zaev, duke theksuar se kapitujt kontestues kanë të bëjnë kryesisht me përdorimin e brendshëm të emrit të ri të vendit", ka thënë ai.
Zaev, i cili bëri thirrje për zgjedhje të parakohshme për muajin prill të vitit të ardhshëm pasi kandidatura e vendit të tij për anëtarësim në BE u bllokua në fillim të këtij muaji, kryesisht nga Franca, thotë se pranimi në BE është rruga e vetme për vendin e tij dhe kombet e tjera të Ballkanit Perëndimor.
“Ne nuk kemi asnjë alternativë. Nuk ka oferta të tjera që mund të shërbejnë si një alternativa. Ajo që mund të na ofrojnë të tjerët nuk na jep demokraci, shtet të së drejtës dhe liri. Nëse drita e yjeve të flamurit të Bashkimit Evropian shuhet, ne do të kemi errësirë këtu. Dhe ne mund të humbasim në këtë errësirë", është shprehur Zaev.
"Nëse radikalizmit dhe ringjalljes së nacionalizmit u jepet tokë pjellore, kjo do të dëmtojë shumë Ballkanin. Dhe kur Ballkani ka një problem, Evropa ka një problem", ka thënë ai.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
