Ministri për Evropën dhe Punët e Jashtme, Ditmir Bushat, po zhvillon një vizitë zyrtare në Gjermani ku takoi homologun e tij, Haiko Maas.
Të dy ministrat diskutuan mbi marrëdhëniet e shkëlqyera mes dy vendeve dhe kontributin e madh që Gjermania ka dhënë për Shqipërinë dhe perspektivën e saj të integrimit në Bashkimin Evropian.
Duke vlerësuar reformat e ndërmarra nga Shqipëria si impresionuese dhe shembull për rajonin sa i takon reformës në drejtësi, ministri i Jashtëm gjerman shtoi se është vendimtare që kjo rrugë të vazhdojë, ndërsa u bëri thirrje aktorëve politikë në vend të mbështesin këto reforma të rëndësishme për vitin 2019.
Nga ana tjetër, Maas shprehu bindjen se integrimi i Ballkanit Perëndimor në Bashkimin Evropian është në interesin e kësaj të fundit për të shmangur shtrirjen e ndikimit të forcave të treta në rajon.
Ministri Bushati falënderoi Gjermaninë për qëndrimin e qartë për sa i takon vendimmarrjes së fundit të BE-së.
“Rruga jonë është e qartë për sa i përket 2019-s dhe 12 muajt e ardhshëm do t'i shfrytëzojmë maksimalisht duke punuar ngushtësisht me Komisionin Evropian për procesin “screening”, nënvizoi Bushati.
Të dy ministrat u ndalën dhe tek siguria dhe klima me të cilin përballet Ballkani Perëndimor dhe roli i Shqipërisë si faktor paqeje dhe stabiliteti.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
