Rama: Skënderbeun do ta çojmë në Paris

<p>Kryeministri Rama shpjegoi në një postim në rrjetet e tij sociale arsyen e mbulimit të monumentit të Skënderbeut në sheshin kryesor të Tiranës. Rama shprehet se monumenti po përdoret si model për një tjetër të njëjtë që do të vendoset në një shesh në kryeqytetin e Francës.</p> <blockquote> <p><em>Qarkullon një kua-kua-kua këmbëngulëse në kënetën sociale për psenë e mbulimit të monumentit të Skënderbeut në Tiranë dhe formulohen mallkime për tradhëti kombëtare, bazuar në akuza për konspiracion kundër Atletit të Krishtit në Muajin e Madhërueshëm të Ramazanit.</em></p> <p><em>Arsyeja është shumë e thjeshtë, po edhe e bukur në këtë rast. Monumenti është veshur me skeleri, sepse po i merren format për realizimin më pas të një kopjeje të tij, e cila do të vendoset në sheshin “Gjergj Kastrioti Skënderbeu” në Paris.</em></p> <p><em>Po po, e lexuat mirë! Parisi do të ketë Skënderbeun e vet.</em></p> <p><em>Pas një përpjekjeje diplomatike të gjatë e të suksesshme, pikërisht sepse sot Shqipëria dëgjohet me respekt, kemi arritur të marrim miratimin e autoriteteve franceze për të vendosur monumentin e Heroit tonë Kombëtar në një shesh të Parisit me emrin e tij.</em></p> <p><em>Punë ditësh dhe skela do të hiqet, kështu që edhe atdhetarët zemërtrazuar që llokoçiten në kënetën e kua-kua-kuave do të mund të çmallen me kalin e Skënderbeut dhe do t’u duhet të gjejnë një tradhëti tjetër për të më akuzuar.</em></p> <p>&nbsp;</p> </blockquote>