Kryetari i Këshillit të Emërimeve në Drejtësi, Ervin Pupe është takuar sot në Gjykatën e Lartë, me Ambasadoren e Shteteve të Bashkuara të Amerikës Yuri Kim, Ambasadorin e Bashkimit Evropian Luigi Soreca.
Këtë takim e ka njoftuar vetë ambasadori Soreca nëpërmjet një postimi ne Twitter ku është shprehur se është e rëndësishme që Gjykata e Lartë të ketë hapur vakancat e mbetura në Gjykatën Kushtetuese.
Takova Kryetarin e Këshillit të ri të Emërimeve në Drejtësi, z. Ervin Pupe, së bashku me ambasadoren e SHBA në Shqipëri. Unë e përgëzova Këshillin e ri, i urova sukses në punën e tyre dhe konfirmova mbështetjen e fortë të BE-së, përfshirë edhe ndihmën tonë teknike. Është e rëndësishme që sapo Gjykata e Lartë të ketë hapur vakancat e mbetura për Gjykatën Kushtetuese, KED do të jetë gati të procedojë, në mënyrë që të sigurojë funksionalitetin e plotë të GJK sa më shpejt të jetë e mundur në muajt e ardhshëm”, shkruan Soreca.
Kreu i KED-së ka njohur anëtarët e delegacionit me veprimtarinë e Këshillit të Emërimeve në Drejtësi, duke shpjeguar rolin e këtij këshilli në përmbushje të detyrimeve kushtetuese e ligjore, në përzgjedhjen e anëtarëve të Gjykatës Kushtetuese, për vitin 2021.
"Bashkëpunimi i ngushtë dhe harmonik mes tre institucioneve kryesore të përfshira në këtë proces siç janë Këshilli i Lartë Gjyqësor, Gjykata e Lartë dhe Këshilli i Emërimeve në Drejtësi, do të sjellë funskionimin me përbërje të plotë të Gjykatës Kushtetuese," është shprehur Pupe për delëgacionin, duke garantuar vijimësinë e traditës së krijuar tashmë nga KED.
Ambasadori i Bashkimit Evropian, Luigi Soreca, shprehu gadishmërinë për të vijuar mbështetjen e KED më asistencë teknike sikurse është ofruar deri tani, duke kërkuar nga ky këshill të vijojë më të njëjtin përkushtim në plotësimin e vendeve vakante në Gjykatën Kushtetuese.
Nga ana e saj Ambasadorja e Shteteve të Bashkuara të Amerikës Yuri Kim, theksoi rëndësinë që ka bashkëpunimi mes institucioneve kyç, për të bërë të mundur emërimin e tre gjyqtarëve të rij të Gjykatës Kushtetuese, duke inkurajuar vijimësinë e suksesit të KED në këtë proces.
Rëndësia e pavarësisë, integriteti dhe efiçenca e plotë e institucioneve të drejtësisë, ishte në fokus të këtij takimi, prej nga ku Kryetari i K.E.D., mori edhe një herë konfirmimin për mbështetjen në implementimin e reformës në drejtësi, nga përfaqësuesit më të lartë të Shteteve të Bashkuara të Amerikës dhe Bashkimit Evropian në Tiranë.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
