Ruçi reagon ashpër: Ilir Meta, të dhamë gjithçka, por njeri nuk të bëmë dot!

Kreu i grupit parlamentar socialist, Gramoz Ruçi, u është përgjigjur ashpër deklaratave t ëish-kreut të LSI-së, Ilir Meta. Ruçi tha dje në një takim elektoral se Meta u bë deputet pa punuar asnjë ditë falë Partisë Socialiste. Ai tha se sido që të dalë rezultati i zgjedhjeve, PS nuk do të bëjë koalicion me LSI-në.

“Ka forca politike që këto zgjedhje kërkojnë t’i bëjnë pis se janë mësuar të rrinë si shushunjë në pushtet duke luajtur me njerëzit. Duke luajtur me vendet e punës, me thesin e miellit. Njëri prej këtyre, Ilir Meta erdhi në Fier për të bërë pis zgjedhjet, foli për socialistët nga më i thjeshti e deri tek Edi Rama. Çfaj i kanë socialistët Ilir Metës? Pa librezë pune, PS e mori Ilir Metën 22 vjeç e bëri deputet, 25 ministër. Pa mbushur 30 vjeç e bëri kryeministër, madje dy herë, Për të arritur në 2005 ta rrëzojë nga pushteti duke bashkuar votat me Berishën. Socialistët e bën kryetar Kuvendi dhe President. Ilir Meta, të dhamë gjithçka, por njeri nuk të bëmë dot. Të të vijë rëndë kur zë me gojë socialistët. Një gjë është e sigurt që ne 25 Qershor me mandate të plota apo të cunguara LSI nuk do të jetë në koalicion me PS. Presionet dhe shantazhet qe bën me votat e socialistëve që e zgjodhën edhe president, që nuk do të dekretojë as qeverinë janë të kota. Nëse ka këto mend të mos bëjë betimin në 24 korrik. Nëse do shkoj me këto mend e do shkel Kushtetutën, është burri i parë që i ka provuar të gjitha, por do të jetë edhe presidenti i parë që do të provojë shkarkimin dhe i pari që do ta firmosë do të jetë Gramoz Ruci“.