Përshkallëzimi i protestave të të rinjve përpara Ministrisë së Arsimit dhe përplasjet e dhunshme me policinë kanë rikthyer në vëmendje tensionet sociale në kryeqytet.
I ftuar në “MCN Live”, politologu Ermal Hasimja analizoi këtë situatë, duke e cilësuar tubimin e studentëve si një vazhdimësi organike të lëvizjes “Revolucioni i Flamingove”.
Sipas tij, dhuna dhe radikalizimi i djeshëm janë pasojë e drejtpërdrejtë e injorimit të gjatë që qeveria u ka bërë kërkesave të qytetarëve që prej muajit maj.
Protesta e madhe që nisi në fund të majit ndoqi një linjë paqësore dhe të qetë. Mirëpo, me kalimin e javëve u pa qartë se qeveria nuk kishte ndërmend të reagonte.
Kjo solli rritjen e nivelit të frustrimit dhe ajo që pamë dje është një lloj reagimi ndaj injorimit të asaj proteste të parë, si dhe një shprehje e zhgënjimit, revoltës dhe mërzitjes së njerëzve në tërësi.
Pra, ky është një vazhdim i lëvizjes së flamengove.
Politologu vuri në dukje se aktet e tensionuara ndaj disa institucioneve apo bizneseve private nuk duhen parë si dramatike në krahasim me standardet evropiane, duke treguar mirëkuptim për revoltën e grumbulluar.
Pamë disa elemente të dhunës ndaj bankave, bashkisë apo ministrive.
Personalisht nuk e përkrah asnjëherë dhunën, por e kuptoj frustrimin e njerëzve që kanë muaj të tërë në rrugë.
Patjetër që ka disa dëme modeste në pronën publike, por nuk mund të krahasohen me ato që ndodhin në protestat e vendeve perëndimore.
Që prej qershorit, lëvizja u nda, një pjesë mendonte se qëllimet arriheshin në mënyrë paqësore, ndërsa një kategori tjetër kërkonte reagim më të fortë.
Dje u bashkuan të dy këta komponentë. Studentët janë ata që e ndezin situatën, pasi janë një lloj 'fuqi baruti', më të organizueshëm dhe të grumbulluar së bashku, ndryshe nga qytetarët e pasdites që vijnë nga cepa të ndryshëm të Tiranës.
Protesta e djeshme ka ribashkuar sërish të gjithë ata që e nisën këtë kauzë.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
