Deputeti i Lëvizjes Bashkë, Redi Muçi, në një intervistë për MCN TV flet për protestën 29-ditore, dimensionin ndërkombëtar të saj, simbolikën e datës 4 korrik dhe përplasjen me narrativën e qeverisë.
Muçi thotë se dimensioni përtej kufijve të Shqipërisë i protestës është jashtëzakonisht i rëndësishëm, pasi sipas tij i jep legjitimitet kërkesave të protestuesve.
I pyetur pse protesta është fokusuar pikërisht në datën 4 korrik dhe cili është mesazhi i kësaj zgjedhjeje, Muçi tha se synohet të bëhet një dallim i qartë mes marrëdhënieve pozitive me Shtetet e Bashkuara dhe kundërshtimit të një projekti që, sipas tij, po hetohet nga SPAK.
Duke qenë se 4 korriku është dita e pavarësisë së SHBA, protestuesit duan të bëjnë dallimin qartaz kundër një projekti të dyshimtë që po hetohet nga SPAK dhe që pronarët e vërtetë të tokës nuk dihet se kush janë.
Ta dallojnë këtë dyshim që lidh projektin, nga ndjenjat e njohura pozitive ndaj rolit që SHBA kanë luajtur në historinë tonë, qoftë për ndërhyrjen në Kosovë dhe për rolin në reformën në drejtësi. Protesta i drejtohet një kaste politike tejet të korruptuar dhe jo investimeve nga SHBA apo kushdo tjetër.
Sa i takon ardhjes së eurodeputetëve në Tiranë dhe nëse pritet një reagim nga ndërkombëtarët, Muçi e cilësoi këtë një zhvillim domethënës dhe tha se do të priste edhe një reagim nga ambasada e SHBA.
Fakti që eurodeputetët po vijnë dhe fizikisht në Tiranë me protestuesit, është një fakt shumë domethënës dhe do prisja dhe një reagim nga ambasada e SHBA, sa i përket protestës.
Masiviteti dhe qëndrueshmëria e protestës, është arma më e fortë legjitime që e ka vendosur në pozitën më të vështirë të mundshme, Kryeministrin Edi Rama.
I pyetur nëse përshkallëzimi i protestës do të ishte një mundësi për të rritur presionin ndaj qeverisë, deputeti i Lëvizjes Bashkë tha se kjo mund të kishte efekt të kundërt.
Nëse do kishte përshkallëzim, kjo do të sillte ulje të numrit të protestuesve, duke qenë se një pjesë e mirë janë familjarë që vijnë me fëmijët, me prindërit, gjyshërit. Larmishmëria, masiviteti është arma më e fortë e protestës dhe përshkallëzimi nuk do të sillte ndonjë fitim.
Nëse protesta është kundër qeverisë dhe sistemit të politikës së vjetër apo nëse ka lidhje me zhvillimet globale dhe “armiqtë e Trump”, siç ka deklaruar kryeministri Rama, Muçi tha se kjo retorikë nuk ka sjellë një përgjigje konkrete.
Fakti që për 29 ditë protestë, e vetmja përgjigje e Kryeministrit Rama kanë qenë armiqtë imagjinarë që i duan të keqen Shqipërisë, tregon se nuk ka pasur një përgjigje.
Çdo skenar me luftë hibride, iraniane, serbe, greke, është thjesht një moment deligjitimimi i vazhdueshëm i retorikës së Kryeministrit dhe ka ndikuar pozitivisht në frymën e protestës, për të afruar më shumë profesionistë dhe shtresë të mesme në protestë.
Deklaratat e Kryeministrit janë fyerje të inteligjencës të atyre që mbarojnë punën paradite dhe i bashkohen protestës pasdite. Nuk shoh reflektim të Kryeministrit.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
