Të kërkuar në Itali për trafik droge dhe pjesëmarrje në organizatë kriminale, arrestohen tre të rinj në Fier

Policia e Shtetit ka njoftuar finalizimin me sukses të tre operacioneve nga Drejtoria e Forcës së Posaçme Operacionale në kuadër të përpjekjeve për kapjen e shtetasve të shpallur në kërkim ndërkombëtar.

Bazuar në informacione të siguruara nga strukturat operacionale dhe në bashkëpunim me autoritetet italiane, gjatë këtyre operacioneve të zhvilluara në qarkun e Fierit u arrestuan tre shtetas shqiptarë, të kërkuar nga drejtësia italiane për trafik droge dhe pjesëmarrje në organizatë kriminale.

-Në kuadër të operacionit “Operacionalja 61”, u kap dhe u vu në pranga shtetasi K. Sh., 24 vjeç, banues në Fier;

-Në kuadër të operacionit “Operacionalja 62” u kap dhe u vu në pranga A. M., 29 vjeç, banues në Fier;

-Në kuadër të operacionit “Operacionalja 63” u kap dhe u vu në pranga shtetasi E. F., 22 vjeç, banues në Fier.

Këta shtetas ishin shpallur në kërkim ndërkombëtar, pasi Gjykata e Riminit, Itali, iu ka caktuar masën e sigurisë “Arrest në burg”, për veprat penale “Organizata kriminale” dhe “Trafikimi i narkotikëve”. Maksimumi i dënimit: 10 vjet burgim. 

Ata akuzohen se gjatë periudhës qershor-dhjetor 2024, në bashkëpunim me njëri-tjetrin dhe me shtetas të tjerë, kanë blerë sasi të mëdha droge, me qëllim shitjen në qytetin e Riminit. 

Interpol Tirana, në bashkëpunim me Interpol Romën, vijon procedurat për ekstradimin e këtyre shtetasve në Itali.