Të shtëna me armë zjarri në autostradën Laç - Lezhë, plagoset një person

Një person ka mbetur i plagosur si pasojë e disa të shtënave me armë zjarri në autostradën Laç - Lezhë.

Ngjarja është shënuar në afërsi të Laçit, ku është qëlluar me armë zjarri në drejtim të një personi.

Nga të dhënat paraprake mësohet se i plagosur ka mbetur Besim Zeneli, 60 vjeç, i cili ndodhej pranë biznesit të tij në autostradë.

Lidhur me ngjarjen policia tha zyrtarisht se rreth orës 00:25, gjatë kohës që shtetasi B. Z. 60 vjeç, banues në fshatin Shullaz, Kurbin, ka qenë në biznesin e tij, dyqan fruta-perimesh, që ndodhet në anë të rrugës, në autostradën Laç - Lezhë, është qëlluar me armë zjarri në drejtim të tij.

Për pasojë, shtetasi Besim Zeneli, ka marrë plagë në trup dhe ndodhet në Spitalin e Traumës në Tiranë, nën kujdesin mjekësor.

Grupi hetimor vijon veprimet në vendin e ngjarjes, duke administruar çdo provë dhe vlerësuar çdo informacion, për zbardhjen e plotë të rrethanave të ngjarjes.

Shërbimet e policisë kanë shoqëruar 3 persona, mes tyre dhe autorin e dyshuar të ngjarjes dhe po kryejnë veprimet hetimore për dokumentimin e plotë ligjor të ngjarjes dhe arrestimin e autorëve të dyshuar.

Për momentin nuk bëjmë me dije identitetin e personave të shoqëruar, për shkak të vijimit të hetimeve dhe ruajtjes së sekretit hetimor.