Në 11 banka të nivelit të dytë në Shqipëri është hequr sekuestroja për mijëra llogari bankare që u përkasin qytetarëve që kanë marrë kredi te dy shoqëritë “Final” dhe “Micro Credit Albania”.
MCN TV ka siguruar vendimin që mban datën 26 gusht, ndërsa lirimi i aseteve financiare të qytetarëve është kryer në fund të këtij muaji. Në një shkresë që mban firmën e drejtueses së seksionit në prokurorinë e Tiranës, Suela Salavaçi, vendimi u është përcjellë bankave të ndryshme, duke dërguar informacion për heqjen e sekuestros të llogarive bankare.
Kujtojmë që sekuestrot ishin vendosur nga përmbaruesit e kontraktuar nga dy institucionet mikrofinancare që akuzohen për mashtrim e zhvatje të qytetarëve. Ende s’ka përfunduar çështja penale ndaj administratorëve të dy shoqërive kredidhënëse.
Në shkresën e organit të akuzës drejtuar bankave të nivelit të dytë, për dijeni edhe Bankës së Shqipërisë, thuhet:
"Në këto kushte me qëllim që të mos vazhdojnë pasojat e veprave penale ndaj qytetarëve, në zbatim të neni 600 i Kodit të Procedurës Civile, dhe Udhëzimin me Nr 2, datë 27.03.2014 "Për Mënyrën e Ekzekutimit të Detyrimeve mbi Shumat e Llogarive Bankare", kërkojmë nga ana Juaj heqjen e sekuestrove të vendosura mbi llogaritë e të gjithë qytetarëve( individëve), nga përmbaruesit të cilëve u është hequr liҫensa dhe për të cilët jeni njoftuar zyrtarisht( nga Ministria e Drejtësisë), që ka të bëjë me urdhërat e ekzekutimit të lëshuara për llogari të shoqërive Micro Credit Albania, me NUIS L41729001H, dhe “Final" me NUIS K81311012P."
Lista e emërave të qytetarëve që do t'u hiqet sekuestrimi i llogarive bankare të na dërgohet në hard copy dhe në mënyrë elektronike me qëllim që në vazhdim të kryhen verifikimet nga Agjencia për Administrimin e Pasurive të Sekuestruara dhe të Konfiskuara.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
