Rusia ka nisur një sulm në shkallë të gjerë me dronë dhe raketa ndaj Kievit, duke plagosur 15 persona në një nga sulmet më të mëdha në kryeqytetin ukrainas që nga fillimi i luftës më shumë se tre vjet më parë.
Rusia lëshoi 14 raketa balistike dhe 250 dronë në orët e para të së shtunës, megjithëse forcat ukrainase qëlluan gjashtë raketa dhe ndaluan shumicën e dronëve para se të arrinin në Kiev.
Presidenti ukrainas, Volodymyr Zelenskyy, tha se ishte një “natë e vështirë për të gjithë Ukrainën” dhe bëri thirrje për më shumë sanksione ndaj Rusisë në mënyrë që të arrihet një armëpushim.
Sulmi ndodhi disa orë pasi Rusia dhe Ukraina filluan një shkëmbim të burgosurish të qindra ushtarëve dhe civilëve, faza e parë e një marrëveshjeje të arritur në Stamboll këtë javë. Marrëveshja u pa si një hap i parë drejt një armëpushimi të përhershëm midis dy vendeve.
Sulmi i ndodhur gjatë natës i bëri njerëzit të strehoheshin në stacionet e metrosë së Kievit. Mbetjet e raketave dhe bombat e pazbuluara shkaktuan dëme në gjashtë lagje të qytetit, me re tymi që ngriheshin nga vendi ku ranë.
Lagjja e Obolonit u godit mjaft rëndë, ku pesë persona mbetën të plagosur dhe një ndërtesë banimi u dëmtua rëndë, thanë zyrtarët ukrainas.
Alarmi për sulme ajrore në Kiev zgjati më shumë se shtatë orë, ndërsa valë të njëpasnjëshme dronësh dhe raketash u lëshuan drejt kryeqytetit. Sulmet pasuan disa ditë sulmesh me dronë ukrainasë ndaj Rusisë, përfshirë Moskën, të cilat e shtynë ministrin e jashtëm rus, Sergei Lavrov, të zotohej për hakmarrje.
Presioni ndërkombëtar për t’i dhënë fund luftës është rritur në muajt e fundit. Donald Trump e ka bërë një qëllim kyç të politikës së jashtme të administratës së tij përfundimin e luftës.
Presidenti amerikan i kërkoi Ukrainës dhe Rusisë të marrin pjesë në bisedime të rinovuara për të arritur një marrëveshje paqeje, një kërkesë për të cilën të dy vendet kanë rënë dakord formalisht.
Udhëheqësit evropianë e kanë akuzuar Moskën për zvarritje të bisedimeve të paqes, ndërsa trupat ruse përpiqen të pushtojnë më shumë territor ukrainas.
Pas sulmit ndaj Kievit, Zelensky akuzoi Rusinë se po përpiqet të sabotojë bisedimet e paqes, një pretendim që Moska ia ka bërë edhe Ukrainës.
Me çdo sulm të tillë, bota bëhet më e sigurt se shkaku i zgjatjes së luftës qëndron në Moskë.
Ukraina ka propozuar një armëpushim shumë herë, por gjithçka është injoruar.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
