Shqipëria zgjidhet si anëtare e përkohshme e Këshillit të Sigurimit të OKB-së

Shqipëria u zgjodh anëtare e përkohshme e Këshillit të Sigurimit të Organizatës së Kombeve të Bashkuara.

 Ministria për Evropën dhe Punët e Jashtme njoftoi se në votim kanë marrë 190 vende, nga të cilat, 175 kanë mbështetur Shqipërinë me votë.

 Shqipëria do të ulet në karrigen e Këshillit të Sigurimit të OKB për periudhën 2022-2023.

 Kjo datë shënoi një moment historik dhe tejet të rëndësishëm për diplomacinë shqiptare, pasi Asambleja e Përgjithshme e Kombeve të Bashkuara votoi për anëtarësimin e Shqipërisë në Këshillin e Sigurisë.

Lidhur me këtë moment historik, ka reaguar dhe Ambasadorja e Shqipërisë në Kombet e Bashkuara, Besiana Kadare.

Këtë lajm e njoftoi dhe Presidenti i Asamblesë së Përgjithshme të Kombeve të Bashkuara në Sesionin e tij të 75-të, Volkan Bozkir në Twitter.

Ky organ i OKB-së me kompetenca të fuqishme, përbëhet nga 15 anëtarë, 5 prej të cilëve të përhershëm: SHBA, Mbretëria e Bashkuar, Franca, Rusia dhe Kina, si dhe 10 anëtarë jo të përhershëm, me një mandat dy vjeçar.

 Shqipëria, Brazili, Gaboni, Gana dhe Emiratet e Bashkuara Arabe ishin në garë, pa konkurrentë nga rajonet përkatëse, për pesë vendet.