Një zyrtar komunal në qytetin e Shtimes, në jug të Kosovës, ka ndërruar jetë nga koronavirusi. Në moshën 34 vjeçare, Afrim Tafa humbi jetën pasi ishte i infektuar me Covid-19.
Kështu ka bërë të ditur kryetari i Komunës së Shtimes, Naim Ismajli.
“Me pikëllim të thellë mora lajmin për vdekjen e bashkëpuntorit dhe kolegut Afrim Tafa i cili si pasojë e virusit COVID19 sot ndërroi jetë”, ka shkruar Ismajli në Facebook.
“Këto ditë që vazhdimisht kisha kontakte përmes telefonit me personelin mjekësor dhe familjarët e tij, shpresoja që Afrim Djali si e quaja unë do ta përballonte këtë sfidë, por ja që Afrimi nuk ia doli dhe na mërziti shumë, sepse si i ri që ishte, dhe një djalë me shumë urtësi e energji për jetën i duhej akoma familjes, shoqërisë dhe vendit. I lehtë i qoftë dheu i Kosovës. Ngushëllime familjes Tafa”, ka shkruar më tej Ismajli.
Ndërkaq, mjekët kanë bërë të ditur se ai kishte probleme me mushkëritë.
Kosova po vazhdon të përballet me situatën e krijuar nga pandemia COVID-19, ku numri i të vdekurve i konfirmuar deri dje pasdite ishte 284.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
