Ushtria në aksion për pastrimin e rrugëve dhe zonave bregdetare

Veç pastrimit të rrugëve dhe zonave të frekuentuara nga turistët, ky aksion ka për qellim edhe ndërgjegjësimin e qytetarëve për mbajtjen pastër të mjedisit.

Ministrja e Mbrojtjes, Mimi Kodheli, ndoqi nga afër punën e efektivëve të cilët po bëjnë të mundur pastrimin e aksit të Morinës dhe i falenderoi ata për të gjithë punën e bërë.

Ndërkohë, ministrja Kodheli përcolli edhe një mesazh për çdo biznes, qytetar si dhe turist. Ajo u bëri thirrje ta konsiderojnë ambientin e përbashkët si ambientin e tyre. Në të njëjtën kohë, Kodheli ftoi strukturat dhe institucionet përgjegjëse që në këtë periudhë të shtimit të fluksit,  të shtojnë kërkesën e llogarisë apo të inspektimit në zona. 

“Kemi dhënë shembullin personal si Forcë e Armatosur, si Ministri e Mbrojtjes duke qenë prezent në të gjitha akset kryesore, në të gjithë rrugët kryesore, për t’i pasur ato të rregullta dhe mikpritëse për çdo turist që vjen nga jashtë apo që nga këtu largohet për jashtë”, u shpreh ministrja Kodheli.