Nga Vlora, kryeministri Edi Rama i ka dhënë një mesazh vlonjatëve demokratë, por edhe çamëve e minoritarëve. Duke folur vlonjatshe, Rama tha se çamëve e minoritarëve që do votojnë për Vangjel Dulen e Dashamir Tahirin ju qoftë jazëk vota.
“Je anëtar i PD? Çfarë problemi ka? Aty të rrish e të rrish me nder. Por a është Luli gati të bëjë punë që mund të bëjë skuadra jonë? A mjafton bindja juaj e djathtë që t’i shkoni mbrapa Dashit të Havasë dhe Vangjelit të bakllavasë?’,- tha kryeministri.
Duke sulmuar sërish kandidatët e PD-së Vanjel Dulen dhe Dashamir Tahirin, Rama shtoi: “Si mund të tallet dhe poshtërohet çështja çame nga Dashi i Havasë dhe një parti e lindur për të mbrojtur minoritetin të parkohet në garazh që Vangjeli dhe Dashi të hipin në autobus dhe minoriteti t’ju shkojë nga pas. Unë ju them vlonjatshe çamëve të Vlorës: Nëse në fletën e votimit në vend që ta bëni flamur kuq e zi, e bëni biletë autobusi për Dashin e Havasë, jazëk ju qoftë”.
Ndër të tjera Rama pranoi se: “Nuk kemi bërë asnjë mrekulli, nuk kemi bërë çdo gjë aq mirë sa duket sepse duhet shume e shumë akoma në çdo sektor dhe për çdo grup moshë në Shqipëri. Ama, besoj se ju kemi dhënë mjaftueshëm të gjithë shqiptarëve provën e ambicies, aftësisë dhe vullnetit për ta bërë shtet këtë vend”.
Në mbylljen e fushatës elektorale të Partisë Socialiste, që u mbajt në Vlorë, kryeministri Edi Rama ka zgjedhur të ndajë emocionet e veçanta edhe me bashkëshorten e tij, Linda Ramën, të cilën e ftoi në podium.
Fill pasi kryeministri mbylli fjalën e tij ku u kërkoi gjithë shqiptarëve votën për zgjedhjet e 25 qershorit, në skenë u ngjit gruaja e tij, veshur me një fustan të kuq, ashtu si flamuri kuq e zi.
Ata përshëndetën sëbashku socialistë, përkrahës të PS-së, ndërsa më pas u futën mes turmës së njerëzve.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
