Një video e transmetuar nga televizioni “Koha” ka vënë në vështirësi kryetarin e Parlamentit të Kosovës. Rasti në fjalë ka të bëjë me kontratën për lejen e ndërtimit të një spitali në hapësirën e QKUK-së në Prishtinë, që dyshohet se ka përfshirë në fajde, mashtrim dhe detyrim, një grup prej së paku 8 personash.
Dy protagonistët në video flasin për shuma të mëdha parash që biznesmeni Faton Dalladaku thotë se i ka dhënë në këmbim të lejes për të ndërtuar spitalin privat. Gjatë bisedës me Rrahim Hashimin, si personi që do t’i ndihmonte Dalladakut për ta ndërtuar spitalin, ky i fundit, për këtë, përmend edhe emrin e Kadri Veselit.
Përtej bisedës që lë vend për dyshime, ajo që mediat e Kosovës nxjerrin në pah si shqetësuese është fakt se organet e drejtësisë e kanë pasur në dorë këtë regjistrim që prej vitit 2013, por nuk e kanë thirrur asnjëherë kreun e Parlamentit për të dhënë dëshminë e tij në lidhje me rastin.
Lidhur me videon e publikuar, Kadri Veseli reagoi sot në një konferencë të jashtëzakonshme. Veseli ka thënë se nuk i njeh personat që bisedojnë dhe përmendin emrin e tij, ndërsa ka shtuar se institucionet e rendit dhe drejtësisë nuk duhej ta kishin mbajtur në sirtaret e tyre këtë rast për 6 vjet me radhë. Kreu i Parlamentit të Kosovës tha se nëse provohet përfshirja e tij në këtë rast, ai është i gatshëm të dorëhiqet.
Veseli është shprehur se do t’i shkojë deri në fund këtij rasti, ndërsa shtoi se reformat që ka ndërmarrë është e pritshme të pasohen me sulme e goditje. Veseli tha se reforma të tilla po ndërmerren edhe në PDK, me qëllim që njerëzit e korruptuar mos të jenë në mesin e tyre më.
Pjesë nga biseda
Faton Dalladaku: A ka shans që i kanë marrë këta paret pa dijen e Kadrisë?
Kadri Rexhepi: Ja, hiç kurrë. Jo, jo, vetë i kam çu unë ato.
Faton Dalladaku: Ti i ke çu?
Kadri Rexhepi: Unë vetë i kam çu.
Fatoni Dalladaku: Faktikisht, po më garanton që i ka marrë prej tij.
Kadri Rexhepi: 200 mijë euro i ka marrë Kadri Veseli.
Fatoni Dalladaku: E, 50-mijëshen?
Kadri Rexhepi: 50 mijë i ka marrë qeky ... (Nuk kuptohet emri).
Në këtë bisedë, biznesmeni Faton Dalladaku i ankohet Kadri Rexhepit se Rrahim Hashimi nuk po ia kthen paratë dhe se kontrata dhe leja për ndërtimin e spitalit nuk iu dha, ashtu siç iu premtua.
Dalladaku: Nëse ka respekt ndaj Kadri Veselit, ndaj meje, ndaj teje, nuk dëgjohet .... ai (Rrahim Hashimi) është dashtë me i lanë krejt punët, sikur unë siç i kam lanë për me e kry’ qit punë, jo me ba biznes, me ble prona në Shqipni, ku i ka marrë ai këto pare, qito paret e mia janë.
Kadri Rexhepi: S’di gja unë. Aty, hiç kurrë mos më vet, kurrë mos më vet për asnjë gja, se tybe nuk di, kurrë, kurrë, kurrë, tybe në dijsha, unë po them a din pse Zoti më ka provu’ me këto gjana, që le se s’ia kam ba, por s’ia kam menue...
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
