Ardian Shtuni, ekspert sigurie në SHBA, thotë se epërsia e pritshme e republikanëve në Dhomën e Përfaqësuesve do të ndikojë ndjeshëm administratën “Biden” në dy vitet e mbetura të mandatit. Në studion e lajmeve të MCN TV, përmes një lidhjeje Skype, Shtuni tha se marrja e kontrollit të Dhomës së Ulët të Parlamentit nga republikanët mund t’u japë këtyre të fundit mundësinë e nisjes së hetimeve për një sërë çështjesh.
Rezultati do të ndikojë ndjeshëm te administrata Biden. Kjo do të ngatërrojë pak kalkulimet e administratës. Do të ndikohet implementimi i axhendës, por edhe hetimet që do të bëhen ndaj administratës. Mund të ketë hetime përsa i përket mënyrës si u larguan SHBA nga Afganistani. Mund të ketë hetime edhe për djalin e presidentit Biden.
Sipas Shtunit, ndryshe nga sa pritej, epërsia e republikanëve nuk do të jetë e thellë, megjithatë e mjaftueshme për të kontrolluar Dhomën e Përfaqësuesve.
Janë zgjedhje të rëndësishme për presidencën Biden. Ka inflacion të lartë prej 9%. Pritej që republikanët të marrin kontrollin e Kongresit. Duhen 218 mandate për ta marrë, por janë në epërsi. Një epërsi e pritshme, pasi tradicionalisht kështu ka ndodhur. Pritej të kishte një dallgë republikane, por kjo nuk po materializohet. Do të ketë një avantazh shumë më të lehtë seç mendohej.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
