Presidenti rus Vladimir Putin firmosi buxhetin e ri të dielën, i cili përfshin shpenzime rekord për nevojat ushtarake në mes të sulmit të vazhdueshëm ndaj Ukrainës.
Rreth 32.5 për qind e buxhetit të vitit 2025 ose 13.5 trilion rubla (119 miliardë euro), është ndarë për mbrojtjen kombëtare, nga 28.3 për qind e raportuar këtë vit, raporton Politico.
Miratimi i buxhetit erdhi pasi zyrtarët e Bashkimit Evropian udhëtuan në Ukrainë për të treguar solidaritet me presidentin ukrainas Volodymyr Zelenskyy.
Shefja e re e marrëdhënieve të jashtme të bllokut, Kaja Kallas, presidenti i Këshillit Evropian Antonio Costa dhe Komisionerja Evropiane për Zgjerimin Marta Kos vizituan Kievin të dielën, në ditën e parë të mandatit të Komisionit të ri Evropian, për të riafirmuar “mbështetjen e tyre të palëkundur për popullin ukrainas”, shkroi Costa në X.
Me luftën në Ukrainë e cila po i afrohet tre viteve, tensionet janë përshkallëzuar kohët e fundit. Moska javën e kaluar kërcënoi se do të godiste ndërtesat qeveritare në Kiev dhe ka nisur sulme masive ajrore në sektorin energjetik të Ukrainës, të cilat Kremlini tha se ishin në përgjigje të përdorimit të armëve të avancuara nga Kievi të ofruara nga Shtetet e Bashkuara të Amerikës dhe Mbretëria e Bashkuar.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
