Abazi: Ballkani i hapur, një shkëputje Kosovë-Shqipëri në përvjetorin e Konferencës së Ambasadorëve  

Forumin “Ballkani i hapur” që u mbajt sot në Shkup, drejtuesi i Vetëvendosjes për Tiranën, Bojken Abazi, e quajti “Ballkani i shqyer”. Në studion e lajmeve në MCN TV, Abazi gjeti analogji me Konferencën e Ambasadorëve, e mbajtur si sot 108 vjet më parë në Londër. Abazi tha se 108 vjet pas shkëputjes së Kosovës nga Shqipëria, me marrëveshjet e sotme u shkëput Shqipëria nga Kosova.   

Data është shumë interesante, 108 vjet më parë Kosova u shkëput nga Shqipëria përmes një vendimi të padrejtë. Kësaj radhe jemi në një situatë neokoloniale. Në këtë rast shkëputet Shqipëria prej Kosovës dhe vendoset nën dominimin e Serbisë. Së pari në aspektin ekonomik dhe më pas edhe më atë politik.

Duke pasur parasysh faktin se Prishtina dhe Beogradi janë në procesin e dialogut, Abazi tha se marrëveshjet e nënshkruara sot janë sabotim i kthesës që ka ndërmarrë Kosova në politikën e jashtme.

Kjo ndodh në një kohë kur po zhvillohet dialogu mes Kosovës dhe Serbisë dhe janë paraqitur disa kushte specifike. Kemi një kthesë në politikën e jashtme të Kosovës dhe këtë moment kryeministri Rama me marrëveshjet e sotme e sabotoi plotësisht. Ne e dimë që Vuçiç ka qenë zëdhënës në qeverinë e Millosheviçit. Kryeministri Rama na thotë të shohim nga e ardhmja, nuk ka rëndësi e kaluara. Vetëm kur vjen puna për krimet gjenocidiale të Serbisë, Rama nuk sheh nga e kaluara.

Sipas Abazit, nisma për Ballkanin e hapur e fut Shqipërinë në një treg që drejtohet nga Rusia.

Këtu nuk jemi duke folur për Ballkan të hapur, por për Ballkan të shqyer. Serbia është futur prej 2019 në marrëveshjet e unionint euroaziatik të themeluar dhe drejtuar nga Rusia. Kryeministri Rama do ta fusë Shqipërinë në një treg të përbashkët me Serbinë dhe Rusinë. Ky është një treg i shqyer. Ne po kërkojmë drejtësi. Kemi një kryeministër që po sillet si feud. Kur nuk funksionon parlamenti dhe jemi mes dy mandateve, në mënyrë tinzare shkon dhe nënshkruan këto marrëveshje.