Banorët e 10 fshatrave në Bashkinë e Mirditës, kanë përshkallëzuar reagimin e tyre në lidhje me degradimin e aksit rrugor Rrëshen-Burrel duke sfiduar motin me shi dhe dalë në protestë.
Këtë të premte ata kanë bllokuar aksin rrugor, duke kërkuar nga Ministria e Infrastrukturës ndërhyrjen për rehabilitimin e kësaj rruge kombëtare, e cila është bërë thuajse e pakalueshme dhe e lënë pas dore.
Infrastruktura e rrënuar sipas tyre ka vështirësuar edhe jetën e mijëra banorëve. Protestës iu bashkua dhe kryebashkiaku demokrat i Mirditës, Albert Melyshi, i cili i bëri thirrje qeverisë për ndërhyrje.
Është një segment i rëndësishëm që lidh edhe me Dibrën, Lurën dhe Matin. Bën madje lidhjen e 3 zonave të qeverisjes vendore. Është një ndër problemet kryesore që kanë banorët. Ndërhyrja është e domosdoshme dhe të bëhet sa më shpejt, jo vetëm për këtë segment, por edhe për të Lurës. Prej korrikut të këtij viti janë ndërprerë punimet, sidomos për segmentin Perlat-Lurë. Segment që zhvillon turizmin malor dhe të të gjithë zonës, i jep ajër dhe frymëmarrje. E drejta e banorëve të protestojnë dhe e imja si kryebashkiak që të ngre zërin për këto probleme dhe zgjidhjen e tyre.
Kjo protestë po ndiqet nga afër edhe nga uniformat e policisë, të cilët ishin paralajmëruar për këtë veprim.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
