Bullizmi është një nga problemet më të rënda me të cilat mund të përballet një njeri. I tillë ishte edhe rasti i Ertugela Abazajt, nga Patosi, që u transmetua nga “Xhadat”, disa ditë më parë.
Ertugela bullizohej për shkak të dhëmbëve të shtrembër dhe si pasojë i kishte shkulur ato. Por përveç kësaj, ajo duhet të përballej edhe me kushtet e vështira ekonomike, në të cilat jetonte së bashku me familjen e saj. Kryefamiljari ishte i papunë dhe i vetmi burim të ardhurash për këtë familje vinte nga kempi që përfitonte djali i vogël, i cili ishte i sëmurë.
Kushtet e banesës ishin tejet të amortizuara. Tavani ishte i rënë, dyshemeja e zhveshur, ndërsa muret të krisura. Pajisjet elektroshtëpiake mungonin, duke e bërë jetësën e tyre tepër të vështirë.
“Endrra ime është të kem dhëmbë të bukur, që të mos bullizohem më”- u shpreh mes lotësh Ertugela.
Për fat të mirë, pas trasmetimit të këtij rasti në emisionin “Xhadat”, ishin të shumta bizneset, të cilat u vetëofruan për t’i ardhur në ndihmë kësaj familje.
Klinika dentare “Mali Dental” mori përsipër të ofrojë shërbim dentar për të gjithë pjesëtarët e familjes, ndërsa dyqani “Elektromagjia Fier”, dhuroi disa pajisje elektroshtëpiake, që mungonin në familjen Abazaj, duke lehtësuar kështu jetesën e tyre.
Por, lajmet e mira për këtë familje nuk mbaruan me kaq. Bashkia e Patosit gjithashtu deklaroi se do të ofrojë një strehë për ta dhe do të shohë mundësinë për t’i siguruar një punë kryefamiljarit.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
