Polonia dërgon 2000 ushtarë në kufi me Bjellorusinë

Polonia konfirmon vendosjen e 2000 trupave në kufi me Bjellorusinë mes tensioneve me Minskun.

“Nuk bëhet fjalë për një mijë përforcime, por për 2000 ushtarë. Vendimi është marrë nga Komiteti i Sigurisë”, tha zëvendësministri i Brendshëm polak, Maciej Wasik, raporton Reuters.

Ushtria do të vendoset në dy javët e ardhshme, ndërsa ushtarët do të dërgohen në rajonet e Podlachia dhe Lublin.

“Të gjitha përpjekjet për kalim janë organizuar dhe përgatitur nga shërbimet bjelloruse”, akuzoi ai.

Të martën ministri i Mbrojtjes, Mariusz Blaszczak, kishte urdhëruar vendosjen e më shumë trupave në kufi, pas një kërkese të Gardës Kufitare, e cila kërkoi një mijë ushtarë për të mbështetur 2000 tashmë në zonë.

Javën e kaluar, autoritetet polake denoncuan hyrjen e dy helikopterëve bjellorusë në hapësirën ajrore polake. Këto akuza janë hedhur poshtë nga Minsku.