Pranë TAP-it, do të ngrihen dy TEC-e me gaz

Në afërsi të Kuçovës parashikohet të ndërtohet edhe një nënstacion elektrik 400 kilovolt që do t’i shërbejë ndërtimit të burimeve të reja energjetike në zonën e Jugut. Në afërsi të Kuçovës do të ndërtohet një TEC me gaz. Lajmi është dhënë në Komisionin e Veprimatarive Prodhuese gjatë raportimit të Agim Bregasit, drejtor i Drejtorisë së Politikave dhe Zhvillimit Elektroenergjetik. Aty do të kalojë edhe projekti i gazsjellësit TAP, ku edhe Shqipëria ka të drejtë të marrë gaz.

“Në masterplanin tonë të gazit parashikohet edhe ndërtimi i disa TEC-ve që do të jenë pikërisht në gjurmën e TAP-it, por për ne si elektrik, kushtet më të mira janë në afërsi të Kuçovës, ku parashikojmë të ndërtojmë në gjurmën e linjës, që ju do të miratoni, ndërtimin e nënstacionit. Aty ka ujë për TEC-in, por është edhe gjurma e TAP-it. Pra, është një pozicion ideal për të ndërtuar një TEC në të ardhmen me gaz” deklaroi Bregasi.

“Duke ndjekur gjurmën e TAP-it, vazhdoi më tej Bregasi,-por dhe perspektivat që kemi pasur ne si drejtori elektroenergjetike, në radhë të parë, parashikojmë që të marrë gaz TEC-i i Vlorës, që në atë kohë është parashikuar të punojë me lëndë djegëse të lëngët dhe me gaz. Pra, konsumatori i parë i TAP-it do të jetë TEC-i i Vlorës, ky që thashë, në afërsi të Kuçovës, dhe tjetri i ka të gjitha kushtet për t’u ndërtuar në afërsi të Zëmblakut ku ne tashmë kemi një nënstacion 300 megavolt amper. Kemi linjën 400 kilovolt Elbasan-Kardhja-Greqi. Lumi është, dhe TAP-i është, kështu që janë dy pozicione fantastike për të ndërtuar termocentrale me gaz nga TAP-i. Në marrëveshjen që kemi ne me konsorciumun që do të ndërtojë TAP-in, janë parashikuar edhe këto sasi gazi për t’u futur në Shqipëri në këto pika”, raportoi Bregasi.