Dhoma Vendore e Avokatisë Vlorë kundër zhvendosjes së Kadastrës: Favorizon centralizimin në Tiranë dhe braktis qytetet historike

Dhoma Vendore e Avokatisë Vlorë ka reaguar ashpër ndaj vendimit të fundit për zhvendosjen e Agjencisë Shtetërore të Kadastrës nga Vlora drejt Tiranës, duke e cilësuar atë si të papranueshëm, të njëanshëm dhe thellësisht të dëmshëm për qytetin dhe qytetarët e këtij qarku. 

Sipas saj, ky veprim është pjesë e një politike të vazhdueshme të zbrazjes institucionale të Vlorës, e cila ka nisur më herët me largimin e Gjykatës Administrative dhe Gjykatës së Apelit, duke cenuar rëndë aksesin e qytetarëve në drejtësi dhe shërbime publike.

Në reagim thuhet se largimi i institucioneve shtetërore përbën diskriminim territorial dhe goditje të drejtpërdrejtë ndaj profesionit të avokatit dhe sigurisë juridike.

Largimi i institucioneve shtetërore nga Vlora përbën:

• Cenim të rëndë të aksesit në drejtësi dhe shërbime publike për mijëra qytetarë;

• Goditje direkte ndaj profesionit të avokatit, funksionimit të sistemit të drejtësisë dhe sigurisë juridike;

• Diskriminim territorial të hapur, që favorizon centralizimin ekstrem në Tiranë dhe braktis qytetet historike e strategjike të vendit."

Dhoma e Avokatisë kërkon rishikimin dhe anulimin e menjëhershëm të vendimit, ndërprerjen e politikës së centralizimit në Tiranë si dhe rikthimin e funksioneve gjyqësore dhe administrative në Vlorë, duke paralajmëruar se në të kundërt do të ndërmarrë çdo veprim institucional dhe ligjor për të mbrojtur interesin publik dhe dinjitetin e qytetit.

Dhoma Vendore e Avokatisë Vlorë kërkon:

• Rishikimin e menjëhershëm dhe anulimin e vendimit për zhvendosjen e Agjencisë Shtetërore të Kadastrës;

• Ndërprerjen e politikës së largimit të institucioneve nga Vlora;

• Rikthimin e funksioneve gjyqësore dhe administrative, të domosdoshme për një qytet të këtij dimensioni dhe rëndësie.