Kushtet në Mariupol 'mesjetare', sulmet pengesë për të shpëtuar civilët e bllokuar

Një deputet ukrainas i ka përshkruar kushtet në qytetin e rrethuar të Mariupolit si "mesjetare".

Dmytro Gurin, një deputet, prindërit e të cilit janë bllokuar në qytetin juglindor, i tha programit të BBC-së Today se furnizimet me ushqim dhe ujë në qytet po arrijnë nivele të ulëta të rrezikshme.

Njerëzve u mungon ushqimi dhe më e rëndësishmja pa ujë. Dhe disa ditë më parë, tanket filluan të qëllojnë ndërtesa nëntëkatëshe, kështu që njerëzit nuk mund të dalin jashtë. Të gjithë janë ulur në apartamentet dhe bodrumet e tyre duke menduar nëse do të vdesin në orën tjetër. Granatimet nuk ndalojnë kurrë dhe të shtënat nuk ndalen kurrë. Aeroplanët, hedhin qindra bomba gjatë 24 orëve.

Gurin shprehu gjithashtu pesimizëm mbi mundësinë e krijimit të korridoreve shtesë humanitare nga qyteti. Ai shtoi se bombardimet e lëshuara mbi qytetin nga forcat ruse e kanë bërë atë të panjohur.

Edhe Kryetari i bashkisë së Mariupolit thotë se luftimet në rrugë dhe qendër të qytetit po pengojnë përpjekjet për të shpëtuar qindra njerëz të bllokuar brenda bodrumit të një teatri që zyrtarët thonë se u bombardua nga Rusia të mërkurën.

Vadym Boychenko thotë se ekipet janë në gjendje të pastrojnë rrënojat dhe të largojnë njerëzit vetëm kur ka qetësi në luftime.

Ka tanke... dhe granatime artilerie dhe të gjitha llojet e armëve të gjuajtura në zonë. Forcat tona po bëjnë gjithçka për të mbajtur pozicionin e tyre në qytet, por forcat e armikut janë më të mëdha se tonat, për fat të keq.

Ai nuk mund të jepte një vlerësim se sa njerëz të tjerë kishin arritur të largoheshin nga zona në 24 orët e fundit. Të premten, autoritetet thanë se 130 njerëz kishin arritur të arratiseshin dhe se më shumë se 1,000 ishin ende në bodrum, i cili i rezistoi sulmit. Rusia mohon të ketë bombarduar ndërtesën, e cila ishte shënuar qartë si një strehë civile.