“Xhadat" publikojnë videon/ Makina e Kryetares së Gjykatës ecën dhe parkon mes njerëzve në trotuar

Emisioni investigativ “Xhadat„ publikoj sot videon ku shfaqej makina e kryetares së Gjykatës Administrative të Apelit, teksa ecte mes njerëzve në trotuarin përpara institucionit për t`u parkuar aty. Në videon e publikuar duket qartë që në makinën e parkuar mbi trotuar, hipën drejtuesja e Gjykatës. Shembullin e drejtueses e ndiqnin edhe punonjësit e kësaj gjykate të cilët parkojnë mbi trotuar duke shkelur hapur Kodin Rrugor. Gjatë monitorimit që “Xhadat" i bënë rrugës u shfaq policia duke marrë me karroatrec një nga makinat e parkuara në rrugë, ndërkohë që nuk ndërhyri për makinat e parkuara mbi trotuar. Gazetarja e emisionit “Xhadat" ju drejtua policit rrugorë që po ndërhynte për largimin e makinës me karroatrec, për ta pyetur se përse nuk po merrte masa edhe për makinat që kishin parkuar mbi trotuar. Edhe pse i kishte përpara syve, punonjësi i policisë mohoi faktin se makina e kryetares së Gjykatës Administrative të Apelit dhe stafit të këtij institucioni ndodheshin të parkuara mbi trotuar. Xhadat: Këtë zonën e kam monitoruar që paradite dhe as gjobë nuk i keni vendosur makina mbi trotuar. Polici: Nuk japim intervista në rrugë. Xhadat: Nuk po ju kërkoj intervistë, po ju them për makinat që janë parkuar mbi trotuar, i keni parë? Polici: Të lutem, vazhdo. Xhadat: I keni parë makinat që janë vendosur mbi trotuar? Polici: Të lutem vazhdo, nuk të jap asnjë sqarim ty fare. Xhadat: Makinat që janë parkuar mbi trotuar, i keni parë? Polici: Nuk janë në trotuar, asnjë makinë nuk ka mbi trotuar. Përgjigja e punonjësit të policisë tregoi hapur bashkëpunimin me institucionin e gjykatës, për të shkelur ligjin. Ky fakt u konfirmua edhe nga punonjësja me uniformën e policisë që qëndron në hyrjen e Gjykatës Administrative të Apelit, sipas të cilës, për parkimin mbi trotuar kanë një bashkëpunim me Policinë Bashkiake. Xhadat: Kjo makina që është jashtë, e gjyqares është? Punonjësja e Gjykatës Administrative të Apelit: Është e kryetares. Xhadat: Edhe makinat e tjera që janë parkuar këtu, se pashë pak minuta më përpara, ju ishit vetë këtu që erdhi policia rrugore dhe hoqi vetëm një makinë që ishte e parkuar në rrugë. Ndërkohë makinat e tjera këtu nuk i luajti fare, makinat e parkuara këtu ( mbi trotuar). Kjo zona këtu është me leje? Punonjësja e Gjykatës Administrative të Apelit: Kjo është zona e gjykatës që nga këtu domethënë ky rreshti këtu është rrethimi i gjykatës dhe si rregull domethënë e kanë lënë, kanë bërë një bashkëpunim me Policinë Bashkiake. Pra drejtuesja e Gjykatës Administrative të Apelit dhe punonjësit e kësaj gjykatë të cilët parkojnë mbi trotuarin përballë Liceut Artistik, nuk e shkelin kodin rrugor pa miratimin e institucioneve të tjera, në rastin konkret, të Policisë Bashkiake.