Begaj pret në Presidencë ambasadorët dhe konsujt: Diplomacia jonë duhet të vijojë mbështetjen pa kushte për Kosovën

Presidenti Bajram Begaj ka pritur pasditen e kësaj të marteje në Presidencë ambasadorët dhe konsujt e Shqipërisë.

Në fjalën e tij, Begaj tha se Shqipëria nuk është ajo e 30-viteve më parë dhe se vendi ynë gëzon prestigj në arenën ndërkombëtare.

Shqipëria nuk është më ajo e 30-viteve më parë. Shqipëria gëzon prestigj dhe vend të merituar në arenën ndërkombëtare.

Vendi ynë tregoi pjekuri gjatë kryesimit të OSBE-së dhe gjatë mandatit të Këshillit të Sigurimit OKB-së.

Dëshiroj të theksoj veçanërisht rolin aktiv që duhet të vazhdojë të luajë diplomacia jonë në marrëdhënie me Kosovën. Kosova nuk duhet të mbetet si një talking point e përsëritur, por duhet të jetë pjesë integrale e aksionit tonë diplomatik.

Diplomacia jonë duhet të vijojë mbështetjen pa kushte për Kosovën. Kosova duhet të mbështetet kurdo e kudo, në çdo rrethanë apo situatë. Është detyra jonë të punojmë për anëtarësimin e Kosovës në organizmat ndërkombëtarë e rajonale, si dhe për njohje të reja të saj.