Rusia dëbon qindra gjermanë që punojnë në arsim dhe kulturë

Qindra gjermanë që punojnë në sektorët e arsimit dhe kulturës do të dëbohen nga Rusia muajin e ardhshëm, njofton ministria e Jashtme gjermane.

Njoftimi konfirmon raportimet e mediave se Rusia kishte vendosur të kufizojë numrin e punonjësve gjermanë nga fillimi i qershorit.

Ata përfshijnë mësues në shkollën gjermane në Moskë dhe staf në shoqatën kulturore të Institutit Goethe.

Lëvizja vjen pas dëbimeve të dyfishta të diplomatëve dhe marrëdhënieve gjithnjë e më të tensionuara midis Rusisë dhe Gjermanisë.

Muajin e kaluar, Rusia dhe Gjermania deklaruan secila 40 punonjës të ambasadave të tyre përkatëse persona non grata, duke i dëbuar.

Gazeta e përditshme gjermane Suddeutsche Zeitung raportoi se masa e fundit do të prekë një numër treshifror të punonjësve, përfshirë diplomatët.

“Në funksion të këtij vendimi të njëanshëm, të pajustifikuar dhe të pakuptueshëm, qeveria federale është e shqetësuar për të siguruar një prani minimale të ndërmjetësve në Rusi duke ruajtur gjithashtu një prani diplomatike”, citon gazeta të ketë thënë ministria e Jashtme gjermane, raporton BBC.

Disa vende të Bashkimit Europian kanë dëbuar diplomatët rusë që nga fillimi i luftës në Ukrainë. Më shumë se 40 diplomatëve të dyshuar për spiunazh iu janë dhënë urdhra dëbimi nga katër vende të Bashkimit Europian në mars të vitit 2022.